УИХ дахь МАН-ын бүлгийн өчигдрийн хуралдаанаар ирэх оны төсвийн талаарх мэдээллийг ажлын хэсгээс сонссон. Төсвийн шүүмжлэл дагуулсан зарим нэг асуудлыг бүлгээр хагалж, байр сууриа нэгтгэсэн .Тодруулбал, хүүхдийн мөнгийг нийт хүүхдийн 91 хувьд нь хэвээр олгохоор шийдвэрлэв. Харин цаашид хүүхдийн мөнгийг олгохдоо эцэг эх нь ажил хийдэг байх зэрэг тодорхой шалгууруудыг тавих нь зүйтэй гэсэн саналыг Төсвийн байнгын хорооны дарга Г.Тэмүүлэн тодотгосон.
Түүнчлэн 2023 оны төсөвт гэр хорооллын өрхүүдийн шөнийн цахилгааны хөнгөлөлтийг хассан байсныг хэвээр суулгах шаардлагатайг Ерөнхий сайд сануулжээ. Үүнийг МАН-ын бүлэг дэмжиж зөвхөн нийслэлийн гэр хорооллын өрхүүдэд шөнийн цахилгааны хөнгөлөлтөд 18.7 тэрбум төгрөг суулгахаар тохиров.
Бүлгийн хуралдаанд Ерөнхий сайд оролцож, авлигтай хатуу тэмцэхээ илэрхийлсэн байна. Тэрбээр сүүлийн үед хийсэн судалгаагаар "Иргэд үнийн өсөлтөд хамгийн их бухимдаж байна мөн авлигатай хангалттай тэмцэхгүй байгааг шүүмжилж байна" гэжээ. Энэ ч хүрээнд Ерөнхий сайд Хөгжлийн банкны асуудлыг хөндөж түүнчлэн нүүрсний бүлэглэлтэй тэмцэхээ битүүхэн илэрхийлсэн нь.
Ерөнхий сайд жил гаруйн өмнө "Авлигатай тэмцэнэ гэдэг бол бид өөрөө өөрсөдтэйгөө мөн намынхаа журмын нөхөдтэйгөө тэмцэнэ гэсэн үг" хэмээн хэлж байснаа бодит болгож Эрдэнэс Тавантолгойн нүүрсний хулгайд холбогдсон намынхаа улстөрчидтэй "үзэх" нь тодорхой болов.
Мөн бүлгийн хуралдаанаар Зам, тээврийн хөгжлийн сайд С.Бямбацогт Ховд, Увс, Баян-Өлгий зэрэг баруун аймгуудын онгоцны тийзийн үнэ өндөр байгаа тул бууруулж, төсвийг нь суулгах санал гаргажээ. Ингэхдээ зөвхөн баруун таван аймгийн иргэдэд онгоцны тийзийн үнийг тодорхой хувиар буулгах санал дэвшүүлж тэрбээр "Нэг талдаа 1000 гаруй км-ийн зайтай баруун таван аймгийн нислэгийн үнэ өндөр байна. Настай хүмүүс, өвчин зовлонтой, эмнэлгийн яаралтай тусламж авах хүмүүс зорчиход онгоцны хэрэгцээ их гардаг. Тиймээс зөвхөн тус аймгийн иргэдэд үнийг бууруулах хэрэгцээ шаардлага байгааг" тодотгожээ. Түүний дээрх саналыг бүлгийн гишүүд дэмжээгүй хэт нэг талыг барьсан санал байна гэж Д.Батлут нарын гишүүд шүүмжилсэн байна.
Өнөөдрийн ханшаар Улаанбаатараас Ховд руу тасалбарын үнэ нэг талдаа 573 мянган төгрөг байгаа бол Баян-Өлгий рүү нэг талдаа 719 мянган төгрөгийн үнэтэй байна.
Түүнчлэн Говь-Алтай чиглэлийн нислэгийн тийз нэг сая гаруй төгрөгийн үнэтэй байгаа талаар саяхан УИХ-ын гишүүн Ш.Раднаасэд чуулганы хуралдаанаар дурдаж, "Орон нутгийн иргэд орон нутаг руугаа нисэж байгаа бол 300 мянга, нийслэлээс албан томилолт аялал жуулчлалаар очиж байгаа бол нэг сая төгрөгийн тизний үнэ төлдөг болох хэрэгтэй. 700 мянган төгрөгийн татаасыг навигацийн орлогоос өгдөг болмоор байна. Авиа компаниудад нислэгийн тоогоор мөнгө өгөхөөр хэн хамрагдагдаад байгаа нь мэдэгдэхгүй байна" хэмээн хэлж байсан.
Ирэх оны төсөвт нэг ч шинэ хөрөнгө оруулалт хийхгүй гэдэг бодлогыг баримталж буй учраас гишүүд тойрогтоо төсвөөс чангаадаг байдлыг таслан зогсоосон. Тиймдээ ч сонгууль дөхөж буй энэ үед тойрогтоо ганц нэг юм зориулах гэсэн гишүүдийн атга санааг ЗТХ-ийн сайд С.Бямбацогт гаргасан ч ийнхүү бүлэг дээрээ дэмжлэг авсангүй.
Ш.АДЪЯАМАА
Улаанбаатар 21°C 
Сэтгэгдэл (21)