Төрийн ордны Их танхимд Авлигатай тэмцэх газар, шүүх, прокурорын байгууллагаас нүүрсний хулгайтай холбоотойгоор жагссан иргэдийн тавьсан шаардлагын дагуу мэдээлэл өглөө.
Мэдээллийн эхэнд ХЗДХ-ийн сайд Х..Нямбаатар хэлэхдээ " Жагсагчидтай уулзлаа. Ажлын хэсэгт жагсагчдын төлөөллөөс 100 хүнийг оруулж хууль хяналтын байгууллагын албаны хүмүүстэй шууд уулзуулъя гэсэн. Гэвч жагсагчид орохгүй. Нүүрсний хулгайчдыг шууд зарла. Маргааш 12 цаг гэхэд нэр холбогдсон хүмүүсийнхээ нэрсийг өг, үгүй бол үргэлжлүүлж жагсана гэж шаардлага тавилаа. Монгол Улс хуультай улс. Хүнийг шууд яллаж болохгүй. Хууль хяналтын байгууллага хуулийн дагуу ажиллаж байна. Харин хурдан ажиллахыг тал талаасаа анхаарах шаардлагатай байна. Хэн нэгнийг мөрдөн шалгах ажиллагаа явуулаагүй байхад буруутай гэж шүүж зарлаж болохгүй. Энэ бол хүний эрхийг дордуулсан хэрэг. Тиймээс хэдүүлээ энэ ажлаа эрчимжүүлье. Засаг газрын мэдээллүүдийг шуурхай гаргаж, бусад улс оронтой мэдээлэл солилцох зэргээр ажлын хэсэгтэй хамтран ажиллана.
Хятадын Засгийн газартай мэдээлэл солилцох хүсэлтээ явуулсан хариу хүлээж байна. Энэ хэрэгт холбогдсон улс төрчдийн нэрсийг, цаашдын мөрдөн шалгах ажиллагаанд саад болохооргүй бол ил болгох талаар ярилцана. Нүүрсний хэрэг дээр одоогоор дөрвөн хэрэг үүсгэн шалгаж байна" гэлээ.
Сэтгэгдэл (0)
Сэтгэгдэл бичигдээгүй байна