"Улаан бал" нэвтрүүлгийн хөтлөгч Ч.Лодойсамбуу Үндсэн хуулийн цэцэд хандахаар болжээ. Тодруулбал, УИХ, Засгийн газар удаа дараа Үндсэн хуулиа зөрчиж иргэдийнхээ эрх, эрх чөлөөнд ноцтойгоор халдаж байгааг дахин сануулж маргааш /2023.01.10/ Үндсэн хуулийн цэцэд хандахаа тэрбээр сошиал хуудсаараа мэдэгдлээ. Тэрбээр энэ тухай "Сүүлийн хэдэн саржин чухал салбарын сайд нартай бараг бүгдтэй нь л нүүр тулж ярилцлаа, асуулаа, шаардлаа. Тоймоороо ч хэллээ. Сэтгүүлчийн ажил нь хүрдэггүй юм бол иргэнийхээ хувиар өргөдлөө бариад очъё" хэмээсэн байна.
Сэтгүүлч Ч.Лодойсамбуу өнгөрсөн долоо хоногийн "Улаан бал" товч тоймоороо "Үнгэсэн хууль" хэмээх сэдвийн хүрээнд Үндсэн хуулийн заалтууд хэрхэн зөрчигдөж буйг тоймлосон.
Тухайлбал, энэ оноос Хувь хүний орлогын албан татварын тухай хуулийн өөрчлөлтийн дагуу сарын 10 сая төгрөгөөс дээш цалингийн орлогоос шаталсан татвар авах хууль хэрэгжиж эхэлсэн.
Энэхүү хуулийн заалтыг сэтгүүлч Ч.Лодойсамбуу тоймдоо хөндөж, тэрбээр "Үндсэн хуулинд хүний хувийн өмчийг төр нь хамгаалах ёстойг тодоос тод зааж өгсөн байдаг. Гэтэл саяхан батлагдсан Хувь хүний мэдээлэл хамгаалах тухай хууль Үндсэн хуулийг үл хэрэгсэж банкан дахь хувь хүний данс, дансны гүйлгээтэй холбоотой мэдээллийг багтааж хамгаалаагүй, задгай орхисон. Монголын төр хүний өмчтэй байх, өмчөө хамгаалах үндсэн эрхийг үндсээр нь зөрчиж эхэллээ. Энэ бол ухралт. Маш том ухралт" гэж үзэв.
Тиймээс Үндсэн хуулиа зөрчиж иргэдийнхээ эрх, эрх чөлөөнд ноцтойгоор халдаж буй асуудлаар УИХ, Засгийн газрыг Үндсэн хуулийн цэцэд өгөхөө илэрхийлэв.
Үндсэн хуулийн цэцэд гаргасан гомдлыг Цэцийн гишүүн хүлээн авсан өдрөөс хойш 30 хоногт багтаан шийдвэрлэдэг хуультай. Өөрөөр хэлбэл, тухайн гомдлыг Цэцийн даргын тогтоолоор томилсон гурван гишүүний бүрэлдэхүүнтэй хуралдаанаар хянан хэлэлцэж, маргаан хянан шийдвэрлэх ажиллагаа үүсгэх эсэхийг шийдвэрлэж магадлал гаргадаг.
Сэтгэгдэл (0)
Сэтгэгдэл бичигдээгүй байна