Б.Энхбаяр: Хөгжлийн банкийг хянан шалгах түр хорооны даргын ажлаа өгөхгүй

УИХ-ын чуулганы хуралдаанаар Б.Энхбаяр гишүүнийг Хууль зүйн байнгын хорооны даргаар сонгох тухай асуудлыг хэлэлцлээ. Хуралдаанд оролцсон гишүүдийн олонх нь түүнийг Хууль зүйн байнгын хорооны даргаар сонгохыг дэмжлээ. 

 Санал хураалт явуулахын өмнө УИХ-ын гишүүн Д.Ганбат Б.Энхбаяр гишүүнийг Хөгжлийн банкны асуудлаар хянан шалгах түр хорооны даргын хувиар энэ ажлаас дуусгах боломжтой эсэхийг тодруулсан.

 Б.Энхбаяр гишүүн түүний асуултад хариулахдаа "Ирэх нэг дэх өдрөөс Хөгжлийн банкны асуудлаар зохион байгуулж буй нээлттэй сонсгол эхэлж хянан шалгах түр хорооны ажлын үр дүнгүүд гарч эхэлнэ. Хяналт шалгалтын түр хорооны даргын ажлаа дуусгана гэсэн бодолтой байгаа. Хийвэл бүү ай, айвал бүү хий гэдэг. Айхгүй байгаа. Энэ түр хороо хуулийнхаа дагуу сонсголуудаа зохион байгуулж, энэ оны дөрөвдүгээр сард УИХ-д тайлангаа тавиад татан буугдана. Байнгын хорооны дарга болсон учраас түр хорооны даргаасаа чөлөөлөгдөх ёстой гэсэн шалтгааныг олж харахгүй байгаа. Түр хорооны даргаасаа чөлөөлөгдөхдөө тулбал Байнгын хорооны дарга болох албагүй" гэсэн юм.