Монгол Улсын Ерөнхийлөгч асан Х.Баттулга УДШ-ийн Ерөнхий шүүгч Д.Ганзориг, иргэн С.Баярцогт нарыг шалгуулахаар ҮХЦ-д энэ сарын 16-ны өдөр гомдол гаргасан билээ.
Өөрөөр хэлбэл, иргэн С.Баярцогт нарт холбогдох хэргийг хууль зөрчин цагаатгасан нь хуульд байхгүй "механизм"-ыг ашиглан хэргийг хянан шийдвэрлэсэн асуудлаар гомдол гаргасан.
Тэрбээр тус албан бичигтээ ҮХЦ-ийн дарга Н.Чинбатын овгийг Луен хэмээн бичсэн. Тэгвэл Х.Баттулга нь Н.Чинбатын овгийг “Луен” гэж илэрхий худал, ташаа бичсэн гэх мэдээлэл байна.
Тодруулбал, иргэн Х.Баттулга Цэцийн Тамгын газрын бүртгэлийн ажилтанд албан ёсоор хүлээлгэн өгсөн мэдээлэл нь “Монгол Улсын Үндсэн хуулийн цэцэд мэдээлэл гаргах тухай” гэсэн хаягтай байсан. Харин энэ мэдээллээс гадна адил агуулга бүхий “бичиг”-ийг иргэн Х.Баттулга дугтуйлж давхар өгсөн байсан. Түүнийгээ “Монгол Улсын Үндсэн хуулийн цэцийн дарга Луен овогт Намжилын Чинбатад" гэж хаягласан байв. Нэгэнт Цэцийн даргын ургийн овгийг илэрхий худал, ташаа бичсэн байсан, түүнээс гадна хуулийн болон албан бичиг хөтлөлтийн холбогдох журмын шаардлагад нийцээгүй буюу үнэн зөв байх үндсэн шаардлагыг хангаагүй тул тус “бичиг”- ийг тухайн иргэнд нь буцаасан" гэж эх сурвалж мэдээллээ.
Ерөнхийлөгч асан Х.Баттулгын ҮХЦ-д гаргасан дээрх гомдолтой холбоотойгоор иргэн С.Баярцогт хэвлэлд өгсөн яриандаа тэрбээр "Үндсэн хуулийн цэц иргэний асуудлыг авч хэлэлцдэггүй. Тэгэхээр тэр асуудал надтай холбоотой асуудал огт биш. ҮХЦ бол УИХ, Засгийн газар, Ерөнхийлөгч, Дээд шүүхийн гаргасан шийдвэрүүдэд асуудал тавьдаг. Надтай холбоотой асуудлыг Дээд шүүхийн эрүүгийн танхим бүрэн бүрэлдэхүүнээрээ шийдсэн. Х.Баттулга асуудлаа олж тавиагүй цэвэр улс төрийн зорилготой акц болсон болов уу гэж харж байгаа" хэмээн ярьсан.
Сэтгэгдэл (0)
Сэтгэгдэл бичигдээгүй байна