Зафер Атеш: ​Монголын ард түмний сайхан сэтгэлийг Туркийн ард түмэн хэзээд мартахгүй

ОБЕГ-ын дэд дарга, бригадын генерал Б.Ууганбаяраар ахлуулсан Эрэн хайх, аврах баг “Буянт-Ухаа” олон улсын нисэх буудлаас өглөөний 04:34 цагт Турк улс руу хөлгийн жолоо залсан. 

Турк улсад одоогоор гамшгийн голомтод эрэн хайх, аврах ажиллагаанд нийт 9698 (3500 цэргийн) алба хаагч, сайн дурын болон дэмжлэгийн 9876 хүн, 216 автомашин, 1511 тусгай техник ажиллаж байна.

Газар хөдлөлтийн гамшгийн голомт болон бусад газруудад газар хөдлөлт болон чичиргээ үргэлжилсээр байгаа бөгөөд эрэн хайх, аврах ажиллагаа үргэлжлэн явагдаж байгаа юм.

 Бүгд Найрамдах Турк Улсаас Монгол Улсад суух Онц бөгөөд Бүрэн Эрхт Элчин сайд Зафер Атеш Монголчуудад хандан хэлсэн үгэндээ тэрбээр "Гуравдагч хөршийн харилцаа гэж юу вэ, ахан дүүсийн  харилцаа ямар байдаг вэ гэдгийг бид яг одоо хараад зогч байна. БНТУ өнөөдөр маш хүнд байдалд байгаа. Та бүхний үзүүлж буй тусламж бидэнд үнэ цэнэтэй байх болно. Та бүхэн очоод нэг ч гэсэн Турк иргэний амь насыг аврах эсвэл аварч чадахгүй байсан ч гэсэн та бүхний хийж байгаа энэхүү үйлдэл Туркийн ард түмний зүрх сэтгэлээс хэзээ ч гарахгүй. Туркийн ард түмэн бусдын сайхан сэтгэлийг хэзээ ч мартдаггүй. Туркийн ард түмний баатрууд нь та нар шүү. Та нар минь зорьсон газраа саадгүй хүрч, эрүүл саруул эргээд ирээрэй. Бид та бүхний төлөө үргэлж залбирах болно" гэлээ.