А.Адъяасүрэн: Би нүүрсний хулгайд холбогдоогүй, дуугүй байна гэдэг хүлээн зөвшөөрсний шинж биш

УИХ-ын гишүүн А.Адъяасүрэнгээс нүүрс тээврийн асуудлаар шалгагдаж байгаа асуудлаар нь тодрууллаа.

-АТГ-аас яллагдагчаар татсан гэж мэдээлсэн хүмүүсийн дунд таны нэр байгаа?

-Нүүрсний хэрэг гэдгийг сэтгүүлчид тодорхой мэдээлэлтэй байж зарламаар байна. Нүүрсний хэрэг дээр холбоогүй гэж АТГ-аас дүгнэлт гарсан байгаа. Миний бодлоор сүүлийн гурван сар ард түмний боломжийг хулгайлсан, нүүрс хулгайлсан улстөрчдийг зарла гэж байгаа. Миний хувьд нүүрний асуудалд огт холбоогүй. Авлигал өгөх гэдэг зүйл анги байгааг мэдэж байгаа. Энэ бол намайг улс төрд орохоос өмнө иргэн А.Адъяасүрэн байхаас цоллож эхэлсэн. Ийм л хэрэг байгаа. Шалгуулж байгаа. Тодорхой хугацаа өнгөрөхөд мэдээллүүдийг өгнө. Тэрнээс биш нүүрс ямар нэг байдлаар хулгайлсан гэдгээр би буруутгагдаагүй.

-Өнгөрсөн хугацаанд таны хамаарал бүхий хэдэн машин нүүрс тээвэрт явж байгаа вэ?

-Явахгүй байгаа. Би хамаарал бүхий байхдаа нүүрс тээврийн бизнес эрхэлдэг байсан нь үнэн. Авлигал өгөх гэдэг үндэслэлээр шалгуулж байгаа. Би та нараас нэг зүйл хүсмээр байна. Манай сэтгүүлчид мэдээллээ үнэн зөвийг нь олох нь зөв. 

2020 оны УИХ-ын сонгуульд өрсөлдөх үеэс эхлээд л энэ асуудал яригдсан. Байж байгаад л ингээд сэргэдэг. Холбоо хамааралгүй нь хаагддаг. Хэний ямар эрх ашгийг хөндөөд одоо намайг ийм асуудалтай холбоод байгааг би сайн ойлгохгүй л байна. Гэхдээ чимээгүй байна гэдэг бол хүлээн зөвшөөрсний шинж биш. Хууль шүүхийн байгууллага ажлаа хийг. Би саад учруулахгүй байгаа. АТГ-ын дуудсан үед нь очиж мэдүүлгээ өгсөн. Монголын төрд, хууль шүүхийн байгууллагад шударгаар ажиллаж байгаа албан хаагчид бий гэдэгт итгэж байна.

-Нүүрсний хэрэгт шууд болон шууд бусаар оролцсон гэх үндэслэлээр шалгаж байгаа гэж ойлгосон. Та шууд бусаар оролцсон гэсэн үг үү?

 -Тэрийг цаг хугацаа харуулах байх. Би бол чимээгүй шалгуулаад л явж байгаа. Хууль шүүхийн өмнө бүх хүмүүс адил тэгш эрхтэй. Саад тотгор хийсэн юм алга.

-Гишүүний бүрэн эрхээс нь түдгэлзүүлэх шаардлагагүйгээр шалгуулаад явна гэсэн үг үү?

-Одоогийн байдлаар миний нэрийг оруулж ирээгүй л байна.