ШШГЕГ: Д.Сүндийг урт хугацааны эргэлт буюу 72 цагийн эргэлтээр ээж нь эргэсэн

“Нэткапитал” ББСБ-ыг үүсгэн байгуулагч, ТУЗ-ийн дарга Д.Сүндий эхнэр Н.Ундрахыг удаа дараа зодож, гэр бүлийн хүчирхийлэл үйлдсэн хэргээ аргалахын тулд Хан-Уул дүүргийн Цагдаагийн газрын I хэлтсийн мөрдөгч, ахмад Г.Даваажав, Сүхбаатар дүүргийн Цагдаагийн газрын мөрдөгч Т.Батсайхан нарт 20 сая төгрөгийн хахууль компанийнхаа ажилтан Д.Баттөгсөөр дамжуулан хувааж өгснийг АТГ-ын Мөрдөн шалгах хэлтсийнхэн шалгаж, тогтоон улмаар шүүхээс Д.Сүндийг гурван жилийн хорих ялаар шийтгэсэн билээ. Тэгвэл түүний эхнэр манай редакцид өгсөн ярилцлагадаа Д.Сүндийгийн сүүлд хамтран амьдарч байсан н.Номин-Эрдэнэ албан ёсны гэр бүлийн баталгаагүй атал хорих ангид 72 цагийн хугацаатайгаар эргэж очсон байсан хэмээсэн. Энэ талаар бид тодруулахад " 2022 оны 12 сард 72 цагийн эргэлтээр Д.Сүндийгийн ээж нь ирэхдээ, сүүлд хамтран амьдарч байсан н.Номин эрдэнийг дагуулж ирсэн, гэхдээ албан ёсны баталгаагүй хэмээн түр уулзуулаад явуулсан, ээж нь 72 цагийн эргэлт хийсэн" гэлээ. 

Д.Сүндий 2021 оны арванхоёрдугаар сарын 03-ны өдрөөс эхлэн гурван жилийн хорих ял эдэлж эхэлсэн бөгөөд нэг жил зургаан сарын хорих ял үлдээд байгаа аж. Түүний магадланд орох боломж 2023 оны есдүгээр сараас нээгдэх аж.