С.Оюун: Хэргийг илрүүлж чадахгүй бол ядаж хүн битгий хэлмэгдүүлээсэй гэж хүсдэг болсон

Төр, нийгмийн нэрт зүтгэлтэн С.Зориг агсны мэндэлсэн өдрийг тохиолдуулан түүний дүү С.Оюун хөшөөнд нь цэцэг өргөж, хүндэтгэл үзүүллээ.   

Энэ үеэр С.Оюун: Өнөөдөр миний ах С.Зориг 61 нас хүрэх байсан. Бид энэ өдөр хөшөөнд нь цэцэг өргөдөг.  Гэвч жил бүр төрсөн өдрөөр нь хэргийн талаар ярьдаг. Өчигдөр мэдээлэл сонссон. Миний бие гадаадад амьдарч байгаа, цөөн хоногоор ирсэн. хэргийн талаарх мэдээллийг уншиж, сонсож байгаа.

Б.Содномдаржаа, Т.Чимгээ нарын хэргийг хэрэгсэхгүй болгосон нь зөв гэж бодож байна. 2016 оны намар хэрэг шүүх рүү явахаар болсон, хэргийн материалтай танилцаж болно гээд анх удаа би танилцаж байсан. Анхны шатны шүүх хурал 2016 оны арванхоёрдугаар сард болсон. Тэр үед анхнаасаа огт итгэл үнэмшилгүй байна гэдгийг хэлж байсан. Гол нь бүх хэргийг төрийн нууцад авч, дээрээс нь шүүх хурлыг хаалттай явуулж байгааг эсэргүүцэж, манай гэр бүлийнхэн оролцоогүй. Эргэлзэж байгаагаа ч хэлж байсан. 

 Хамгийн гол нь, төрийн нууц учир яагаад итгэл үнэмшилгүй байгаагаа хэлж болдоггүй байсан. Манай гэр бүл УИХ-ын Тусгай хяналтын дэд хороонд хэргийг нууцаас гаргах ёстой гэдэг асуудлаар удаа дараа шаардаж байсан.

Харамсалтай нь, хэрэг гурван шатны шүүхээр явж батлагдаад, тэр хүмүүс шоронд орсныг би хэлмэгдсэн гэж боддог.

 ХЗДХ-ийн сайд асан Ц.Нямдорж хоёр, гурван жилийн жилийн өмнөөс хэргийг нууцаас гаргахыг санаачилсан. Манай өмгөөлөгч мөн адил нууцаас гаргахыг шаардлагыг тавьж байсан. Нууцаас гарч байж л үнэмшилтэй юу, үгүй юу гэдгийг хуульч, өмгөөлөгчид мэднэ. Хэдий нууцаас гаргах Засгийн газрын тогтоол гарсан ч прокурор дээр шат шатандаа бүтэн хэрэгжиж дуусаагүй байгааг хэрэгжүүлэх ёстой гэж бодож байна.

Ний нуугүй хэлэхэд, энэ хэргийн захиалагч, гүйцэтгэгчийг нь илрүүлж чадахгүй олон жил явлаа. Сүүлдээ бид илрүүлж чадахгүй бол ядаж хүн битгий хэлмэгдүүлээсэй гэж санаа зовж байсан" гэлээ.