"Мөнхөд дурсагдах дайчид" жагсаал өчигдөр /2023.05.07/ болж, жагсаалд оролцогчид Офицеруудын ордноос Жуковын талбай хүртэл алхаж, Зөвлөлт Холбоот Улсын маршал Г.К.Жуковын хөшөөнд цэцэг өргөн, хүндэтгэл үзүүлсэн.
Уг жагсаалыг Батлан хамгаалах яам зохион байгуулсан гэх мэдээллийн дагуу тус яамны сайд Г.Сайханбаяраас тодрууллаа.
Тэрбээр "Дайнд амь үрэгдсэн дайчдын алдрыг мөнхжүүлэх зорилготой олон нийтийн байгууллагын төлөөлөл тавдугаар сарын 4-ний өдөр Батлан хамгаалахын яаманд хүсэлт гаргасан.
Уг хүсэлтэд "Бид амь үрэгдсэн дайчдын дурсгалыг хүндэтгэх жагсаалыг зохион байгуулах гэж байна, энэ жагсаалд дэмжлэг үзүүлж хөгжим, хүн хүч гаргаж өгнө үү" гэдэг хүсэлт тавьсан. Өнөөдөр дэлхий, бүс нутгийн цаг, улс төрийн нөхцөл байдал амаргүй, хүндхэн сорилтын дунд амьдарч байна. Монгол Улс ч гэсэн мөн ялгаагүй хойд хөрш дайн байлдаантай байгаа энэ цаг үед дээрх арга хэмжээг хамтран зохион байгуулах боломжгүй гэж үзээд төрийн байгууллагаас оролцоогүй.
Уг арга хэмжээнд Батлан хамгаалах яам болон Засгийн газраас ямар ч оролцоо байхгүй.
Монгол дахь олон нийтийн сайн дурын байгууллага болох "Новороссия андууд нийгэмлэг" ТББ-аас жагсаалыг зохион байгуулсан. Офицеруудын ордны үүдэнд хүмүүсээ цуглуулж тухайн жагсаалыг зохион байгуулсан. Энэ жагсаалд тухайн олон нийтийн байгууллагад орж дэмждэг бэлтгэл, чөлөөнд байгаа офицер, ахлагч нар цөөн тоогоор оролцсон. Жагсаалд оролцсон хүмүүс төрийн албан хаагчид биш, олон нийтийн байгууллагын гишүүнчлэлтэй цэргийн зарим албан хаагч оролцсон.
Нөгөө талаар ийм нөхцөлд байдалд аливаа асуудлыг туйлшруулах, талцал хуваагдлыг бий болгох эсвэл нэг талыг барих нь маш эмзэг. Ялангуяа гадаад харилцааны нөхцөл байдал сорилтод амаргүй байгаа энэ цаг үед ард түмэн маань асуудалд болгоомжтой, мэдрэмжтэй хандахыг хүсч байна.Зарим нэр нөлөө бүхий олны танил хүмүүс энэ асуудлыг мушгин гуйвуулсан" гэлээ.
Сэтгэгдэл (0)
Сэтгэгдэл бичигдээгүй байна