Засгийн газрын хуралдаанаас гарсан шийдвэрийн талаар ЗГХЭГ-ын дарга Д.Амарбаясгалан мэдээлэл хийлээ. Тэрбээр мэдээллийн эхэнд “Эмээлт эко аж үйлдвэрийн паркын талаар авах зарим арга хэмжээний тухай” Засгийн газрын тогтоолын төслийг хэлэлцэн дэмжсэн талаар мэдээллээ.
Мөн агаарын тээврийн үнийг буулгах томоохон шийдвэр гаргажээ. Энэ талаар тэрбээр хэлэхдээ " 2023 оны долдугаар сарын 1-нээс эхлэн агаарын тээврээр зорчдог есөн аймагт тасалбарын үнийг 50-70 хувиар хямдарч байна. Өнөөдөр Баян-Өлгий аймаг руу хоёр талдаа 1,6 сая төгрөгөөр нисдэг байсан бол ирэх долдугаар сарын 1-нээс хоёр талдаа 600-650 мянган төгрөгөөр зорчих боломж нээгдэж байна.
Говь-Алтай, Баянхонгор, Завхан, Хөвсгөл, Өмнөговь, Дорнод гээд есөн аймагт агаарын тээврийн зорчих хөдөлгөөний урсгалыг нэмэгдүүлнэ. Энэ дагуу МИАТ компанийг орон нутгийн нислэгийг түрээсийн онгоц ашиглаж үйлдэнэ. Ирэх оны нэгдүгээр сарын 1-ээс 75 хүний суудалтай онгоц худалдан авна.
Яагаад "МИАТ" компанийг орон нутгийн нислэгт оролцуулж байна вэ гэхээр Монголын тодорхой салбаруудад маш их монополийг бий болгосон байна гэдэг дүгнэлт гарч байна. Баян-Өлгий аймаг руу нисээд ирж буй 45 хүний суудалтай онгоцны зардал 35 сая төгрөг байхад нэг удаа нисэхдээ хамгийн багадаа 70 сая төгрөгийн ашиг олж байх жишээтэй. Өрсөлдөөнгүй салбар үүссэний хор уршгийг ард иргэд нуруундаа үүрч байна" гэлээ.
Сэтгэгдэл (0)
Сэтгэгдэл бичигдээгүй байна