Хотын дарга Д.Сумъяабазарын газар олголтын мэдээллийг ил болголоо

ЦХХХ-ны сайд Н.Учрал таван төрлийн тусгай сангийн мэдээллийг ил болгож байгаа талаар өнөөдөр /2023.05.26/  мэдээлэл хийж, дараах сангуудын мэдээллийг ил болголоо. 

1.Байгаль орчин уур амьсгалын сан

2.Шинжлэх ухаан технологийн сан

3.Хилийн чанадад байгаа Монгол улсын иргэдэд туслах сан

4.Гэмт хэргийн хохирогчдод туслах сан

5.Кино урлагийг дэмжих санг нээлттэй болгож байна.

 Ингэснээр Засгийн газрын 25 сангийн 14 нь ил боллоо. Ирэх долоо хоногт дахин таван санг нээлттэй болгохоо ЦХХХ-ы сайд Н.Учрал хэлэв.

 Монгол Улсын Засгийн газрын тусгай сангийн тухай хуульд 25 тусгай сан байдгаас есөн тусгай сангийн мэдээлэл ил болоод байсан бол өнөөдөр нэмж таван тусгай сангийн мэдээллийг shilen.gov.mn сайтад ил тод байршууллаа.

Хоёр долоо хоногийн өмнө 20 жилийн өмнө үе үеийн хотын дарга нарын газар олгосон талаарх мэдээллийг ил тод, шилэн байршуулсан бол одоогийн нийслэлийн засаг даргын газар олгосон мэдээллийг ил болгож байна. Дүүргийн газар олголтын мэдээллийг бид шаардаж байгаа. Бидэнд одоогийн байдлаар долоон дүүрэг, үе үеийн дүүргийн Засаг дарга нарынхаа газар олголтын мэдээллийг илгээсэн. Хоёр дүүргийн мэдээллийг нэмээд ирэх долоо хоногт нийслэлийн үе үеийн дүүргийн засаг дарга нарын газар олголтын мэдээллийг ил болгоно. Үүний үр дүнд дүүргийн удирдлага, нийслэлийн удирдлага хаана, ямар газар олгосныг харьцуулж харах боломж бүрдэнэ. Нийтийн эзэмшлийн газарт хэн, хаана, ямар зориулалтаар өгөв гэдэг нь харагдана.

Түүнчлэн өнгөрсөн даваа гаригийн байдлаар төрийн болон орон нутгийн өмчит, өмчийн оролцоотой төлөөлөн удирдах зөвлөл бүхий 120 хуулийн этгээдийн 1059 төлөөлөн удирдах зөвлөлийн гишүүдийн нэрс, цалингийн мэдээллийг нээлттэй байршуулсан байсан болон өнөөдрийн байдлаар Нийслэлийн өмчит, нийслэлийн өмчийн оролцоотой 18 хуулийн этгээдийн 119 төлөөлөн удирдах зөвлөлийн гишүүүдийн нэрс, цалингийн мэдээллийг нэмж орууллаа. Нийт 138 хуулийн этгээдийн 1178 төлөөлөн удирдах зөвлөлийн гишүүдийн нэрс, цалингийн мэдээлэл ил боллоо.

Байгаль орчин, уур амьсгалын сангийн нийт санхүүжилт 17 тэрбум 714 сая төгрөг. Олгосон санхүүжилтийг ил болгож байна. Нийт 11 тэрбум төгрөгийг 1091 төсөл арга хэмжээнд зориулж санхүүжилт олгосон байна. 

Кино урлагийг дэмжих сан: Төрөөс кино урлагийг дэмжиж 11 хуулийн этгээдэд нэг тэрбум төгрөг олгожээ. Кино бүтээх үйл ажиллагааг төрөөс дэмжих зориулалт бүхий энэхүү сан нь 2022 онд байгуулагдсан. 2023 онд уран сайхны болон баримтат киноны төслийг дэмжих чиглэлээр эргэн төлөгдөх нөхцөлгүй улсын төсвийн хөрөнгө оруулалтаар олгосон 1,071,200,000 төгрөгийн санхүүжилтийн гэрээ байгуулсан 11 хуулийн этгээдэд олгосон байна.