“Кью эс си” компани татварын 122 тэрбум төгрөгийн өр үлдээжээ

“Дарханы төмөрлөгийн үйлдвэр” ХК -д Засгийн газраас оруулсан хяналт шалгалтаар тус үйлдвэрийг 7 жилийн хугацаанд концессоор эзэмшсэн “Кью эс си” компани санхүүгийн олон зөрчил гаргасан талаар мэдээлэл цацагдаад байна. Тухайлбал, тус үйлдвэрийг ашиглаж байх хугацаанда 122 тэрбум төгрөгийн татвараа төлөөгүй, өр нь хуримтлагджээ. 2014 онд концессын гэрээ албан ёсоор байгуулагдаж уг компани барих, ашиглах, шилжүүлэх гэсэн заалттайгаар хөрөнгө оруулалт хийж Дарханы төмөрлөгийн үйлдвэр ХК-ийг гангийн үйлдвэрлэгч болгохоор ажиллаж эхэлсэн. Гэвч өнөөдрийг хүртэл ширхэг хадаас барилгүй, өр төлбөртэйгээр үлдээсэн байна.

 Хувийн хэвшлийн байгууллагууд 100 мянган төгрөгийн татварын өртэй бол дансыг нь хааж, хууль хяналтын байгууллага хариуцлага ногдуулах арга хэмжээ авдаг. Гэтэл “Дарханы төмөрлөгийн үйлдвэр” ХК-г ашигласан “Кью эс си” компани нь 122 тэрбум төгрөгийн татварын өр үлдээсэн байх жишээтэй. Уг компани нь дан ганц татварын өрөөр зогсохгүй. Хяналт шалгалтаар нийт 2,6 их наяд төгрөгийн хохирлыг тогтоогоод байгаа юм. Харин одоог хүртэл хууль шүүхийн байгууллага энэ асуудлыг эцэслэн шийдвэрлэхгүй байгаа нь олны анхаарлыг татаж байна.