Д.Энхтүвшин: Бизнесийн орчинг сайжруулахын төлөө сэтгэл гарган, хичээж ажиллана

Дөрвөн жилд нэг удаа болдог Монголын Үндэсний Худалдаа, Аж Үйлдвэрийн Танхимын ээлжит XXI Их хурал өчигдөр /2023.09.20/ болж тус их хурлаар МҮХАҮТ-ын Удирдах зөвлөлийн гишүүд болон ерөнхийлөгчийг сонголоо. 

Тус танхимын ерөнхийлөгчид 13 хүн нэр дэвшүүлснээс Д.Энхтүвшин олонхийн санал авч ирэх дөрвөн жил бизнес эрхлэгчдийн дуу хоолой нь болж ажиллах үүрэг хүлээлээ. Түүнийг шарк гэдгээр нь олон хүн андахгүй. Тэрбээр "МҮХАҮТ-ын 21-р их хурлаас ерөнхийлөгчөөр сонгогдон өндөр хариуцлага хүлээж авлаа. Дэмжиж байгаа бүх хүмүүсдээ баярлалаа. Бизнесийн орчинг сайжруулахын төлөө сэтгэл гарган, хичээж ажиллана" гэжээ.

Хувийн хэвшлийн хамгийн том нэгдэл МҮХАҮТ нь сайн дурын үндсэн гишүүнчлэлтэй, өөрөө удирдах ёсны байгууллага юм.

Танхим 5900 гаруй гишүүн байгууллагатай, 21 аймагт салбар Танхимтай, 23 улсад 51 төлөөлөгчтэй. 

 Д.Энхтүвшин MУИС-ийг төгсөн 1997 онд "МCS" группээс ажлын гараагаа эхэлсэн бөгөөд түүнээс хойш тус компанийн олон төсөлд үр бүтээлтэй ажиллаж, “Дэлхийн хөгжлийг Монголд” уриагаа бодитоор хэрэгжүүлэхэд нь үнэтэй хувь нэмэр оруулж ирсэн юм. Монголын топ компанид 20 гаруй жил ажиллаж, бизнесийн талбарт арвин туршлага хуримтлуулсан.