Агаарын бохирдлоос сэргийлэх төслийг Хэнтий аймагт хэрэгжүүлж эхэллээ

Монгол гэрийн халаалт, дулаалга, агаар сэлгэлтийн ЧИП багцыг иргэдийн хэрэглээнд нэвтрүүлэх төслийн нээлт Хэнтий аймагт боллоо. Нээлтийн өдрөөр тус багцыг 11 иргэнд гардуулсан бөгөөд нийт 50 иргэнд үнэ төлбөргүй олгох юм. Уг төслийг НҮБ-ын Хүүхдийн сан, Швейцарийн хөгжлийн агентлаг (ШХА), Монгол Улсын Засгийн газрын санхүүжүүлэлттэйгээр Пийпл Ин Нийд /People In Need/ ТББ, Монголын Тогтвортой Санхүүгийн Холбоо /ТоС Холбоо/, ШУТИС хамтран хэрэгжүүлж буй. 

ЧИП багц нь нэмэлт дулаалга, эрчим хүчний хэмнэлттэй халаалт болон агаар сэлгэлтийн гурван багцаас бүрддэг. Нийт багцын үнэ байршлаас хамаарч 2,800,000-3,000,000 төгрөг бөгөөд Хаан, Хас, Төрийн банкны Ногоон зээл, Транскапитал ББСБ, GSB капитал, Нөмөр, Нэткапитал зэрэг банк бус санхүүгийн байгууллагуудаас хөнгөлөлттэй зээлээр авах боломжтой юм.