Энэ долоо хоногт ЗГ-ын хуралдаанаар БЭТ-ийн ажлын тайланг хэлэлцэнэ

Монгол Улсын Засгийн газрын 2022 оны аравдугаар сарын 26-ны 385-р тогтоолоор “Эрдэнэс Тавантолгой” ХК-д Онцгой дэглэм тогтоож Засгийн газрын бүрэн эрхт төлөөлөгчөөр Сангийн яамны төрийн нарийн бичгийн дарга Ж.Ганбат томилогдон ажилласан. 

Засгийн газраас тогтоосон Онцгой дэглэмийн хугацаа дууссантай холбогдуулан “Эрдэнэс Тавантолгой” ХК-ийн Төлөөлөн удирдах зөвлөл хуралдаж компанийн гүйцэтгэх захирлын үүрэг гүйцэтгэгчээр “Эрдэнэс Тавантолгой” ХК-ийн Дотоод хяналт, эрсдэлийн удирдлагын газрын захирал Х.Мөнхжаргалыг өнгөрсөн Баасан гаригт /2023.10.27/ томилсон.  Учир нь тус албан тушаалд сонгон шалгаруулалт зарлагдаагүй учраас гаднаас шинэ хүн томилох боломжгүй харин гүйцэтгэх захирлын үүрэг гүйцэтгэгч 14-21 хоногийн хугацаанд ажиллах хуулийн хугацаатай.

Тэгвэл энэ долоо хоногийн Засгийн газрын хуралдаанаар Бүрэн эрхт төлөөлөгчийн ажлын тайланг хэлэлцэж, дахин Бүрэн эрхт төлөөлөгч томилох эсэх асуудлыг шийдвэрлэх аж.

“Эрдэнэс Тавантолгой” ХК-д Онцгой дэглэм тогтоосон нэг жилийн хугацаанд нүүрс олборлолтыг 3 дахин, нүүрс тээврийг 3.5 дахин, орлогыг 3.6 дахин, нүүрс борлуулалтыг 3.9 дахин нэмэгдүүлж, улсын төсөвт 2.7 их наяд төгрөгийн татвар хураамж төвлөрүүлжээ.