Д.Ганбат: МАН-ын тэнэглэл, шуналд хязгаар гэж алга

УИХ-ын чуулганы нэгдсэн хуралдаанаар ирэх оны улсын төсвийн төслийн гурав дахь хэлэлцүүлгийг хийж байна. 

УИХ дахь АН-ын бүлгийн дарга О.Цогтгэрэл "Ирэх оны төсвийг одоо хүчин төгөлдөр үйлчилж байгаа төсвийн хүрээний мэдэгдлийн хүрээнд өргөн барих ёстой. Гэтэл төсвийн өөр мэдэгдэл оруулж ирээд давхар хэлэлцэж байна. Ирэх оны төсөв эцэслэгдэн батлагдах гэж байна. Авилгаа хуульчилсан хууль болно. Энэ төсвөөр үнийн хөөрөгдөл бий болно. Сонгуульд зориулсан халамж чинь нөгөө талдаа үнийн хөөрөгдөл бий болгоно. Иймд АН-ын бүлэг нэг хоногийн завсарлага авахыг хүсье" гэлээ. 

Төсвийн ажлын хэсгийн ахлагч Д.Тогтохсүрэн "Ирэх оны төсвийн төслийг дагуулж оруулж ирсэн 20 орчим хуулийн төслийг батална. Дараа нь улсын төсвөө батална. УИХ хууль зөрчөөгүй. Та хэрэв хууль зөрчсөн гэж үзэж байга бол хандах газраа хандаж болно". 

. 

УИХ-ын гишүүн Д.Ганбат "Найман жил явж явж ирснээ сүүлийн нэг жил нь малчдад хайр зарлаж байгаа нэртэй ноос, ноолуурын нэмэгдлээ арай бага нэмээд байгаа юм биш үү. Найман жилийн турш малчид төрийн бодлогоос гадна байсан. Сонгууль угтаж шоу хийж байгаа бололтой. Бид нар дуугүй байгаа нь та нарын хулгайг хүлээн зөвшөөрч байгаа гэсэн үг биш үү. Алдагдалтай төсөв батлах гэж байна. Ирэх оны дөрөвдүгээр сарын 1-нд тэтгэврийг 100 мянган төгрөгөөр нэмэх юм байна. Заавал яагаад хүн хуурдаг өдөр сонгож байгаа юм бэ. Иргэдээ басамжилж, үгүйсгэж байх юм. Эрт зарлаад дуулиан болдог. Та нарын тэнэглэл, шуналд хязгаар үнэхээр алга. Хязгаартай цөөн хэдэн хүн бий. Та нар амаараа авлигатай тэмцэнэ гэж хэлдэг ч амьдрал дээр алга. Одоо сонгуулиар урдаа МАН-ын нэр зүүсэн ямар ч хүн яваад нэмэр байхгүй шүү, эвсэл интэр гээд та нар явах биз. Хүн хуураад сурчихсан хүмүүс" гэлээ.