Цас орсон өдрөөс хойш 435 хүн ГССҮТ-д ханджээ

Нийслэлд гэнэт ихээр орсон цас авто болон явган хүний зам, нийтийн эзэмшлийн талбайд  халтиргаа гулгаа үүсгэн гэмтэж бэртэх иргэдийн тоог нэмэгдүүлээд  байна.Цас орсон эхний өдөр /2023-11-03/ -аас хойш  халтирч унаж бэртсэн нийт 435 хүн Гэмтэл согог судлалын үндэсний төв болон салбар эмнэлгийн Яаралтай тусламжийн тасагт тусламж үйлчилгээ авчээ.Үүнээс төв эмнэлэгт 357, салбар эмнэлэгт 78 хүнд яаралтай тусламж үйлчилгээ үзүүлсэн бөгөөд сүүлийн гурав хоногийн байдлаар, үйлчлүүлж буй иргэдийн тоо 2 дахин өссөн байна.

Тухайлбал, халтиргаа гулгаанаас үүдэлтэй бэртэж гэмтсэн иргэдийн тоо 11-р сарын 7-ны өдөр 39, 8-ны өдөр 86 байсан бол, 9-ний өдөр 88 хүн ГССҮТ-д яаралтай тусламж үйлчилгээ авсан байна. Мөн энэ сарын 3-10-ны хооронд осголт, хөлдөлтийн шалтгаант тохиолдол нийт 18 бүртгэгджээ.

Иймд иргэд та бүхнийг болзошгүй эрсдлээс урьдчилан сэргийлэн мэргэжлийн байгууллагуудаас өгч буй зөвлөмжийг дагаж мөрөхийг зөвлөж байна.