Гэр хороолол дунд явах бага оврын 50 автобус мөн маапаан дагуулжээ

НИТХ-аар Нийслэлийн 2023 оны төсвийн тодотголыг хэлэлцлээ. Энэ удаагийн төсвийн тодотголд орон нутгийн төсвийн урсгал болон гүйцэтгээгүй хөрөнгө оруулалтын ажлуудыг дахин тодотгож буй. Түүнчлэн нийслэлд барьж байгаа 37 сургууль, цэцэрлэгийн ажлыг энэ онд гүйцэтгэлийн дүнгээр нь санхүүжүүлэх, хот, нийтийн аж ахуйн тоног төхөөрөмжийг шинэчлэх, бүтээн байгуулалтад шаардлагатай газар чөлөөлөлтийн ажлыг санхүүжүүлэх аж. 

Ногоон автобусны талаар Нийслэлийн Засаг дарга Х.Нямбаатар ярихдаа "Улсын төсөвт өмнөх Түгжрэлийн сайд Ж.Сүхбаатар сайдын багцад 318 тэрбум орчим төгрөг автобусын парк шинэчлэлд батлагдсан. Үүнээс 100 ногоон автобус болон бүрэн цахилгаан "скайвел" 50 автобус мөн гэр хороолол дундуур явах бага оврын 50 автобус гээд нийт хилээр орж ирсэн 200 автобус байгаа. Үүнээс 100 ногоон автобусыг авахгүй гэдэг бичгээ өгөөд гэрээгээ цуцалсан. Нэг ч ногоон автобус авахгүй. Ногоон автобус худалдан авсан 130 тэрбум төгрөгийн хохирлыг барагдуулах үүднээс 50 "скайвел" автобусыг хүлээгээд авчихсан юм билээ, ашиглалтын шаардлага хангана гээд. Харин бага оврын 50 автобусны гаалийн бүрдүүлэлт маапаантай байгаа учраас АТГ-т шалгуулсны дараа бид хүлээн авах эсэхээ шийднэ. Тэнүүн-Огоо ХХК-иар хохирлыг барагдуулах үүднээс тус компанийн өмчлөлийн бүх баазыг 54 тэрбумаар нийслэл үнэлж авахаар болсон. Сангийн яам 11 тэрбум төгрөгийн тендерийн баталгаа буюу дансанд байршуулж мөнгөө татаж авсан" гэлээ.