Цагдаагийн хурандаа мөрийтэй тоглоомчдоос байнга мөнгө авч, хэргийг нь дардаг байжээ

Цагдаагийн байгууллагаас "Pokerrrr2" аппликейшн ашиглан хууль бус цахим мөрийтэй тоглоом ажиллуулж, иргэдийг татан оролцуулж, их хэмжээний ашиг олсон этгээдүүдийг илрүүлж, шалгаж эхэлжээ. Цахим мөрийтэй тоглоомыг З, С, Т гэгч этгээдүүд зохион байгуулж, иргэдийг хохироож хууль бусаар олсон мөнгөөрөө өндөр үнэтэй хаус, орон сууц, жийп маркийн автомашин худалдаж байсан нь тогтоогдсон байна. Тэд хууль бус үйлдлээ нуун далдлах зорилгоор хуулийн байгууллагын нэр бүхий хурандаа цолтой албан тушаалтантай хамтарч цахим мөрийтэй тоглоом ажиллуулдаг байсан байна. Цагдаагийн байгууллагаас Эрүүгийн хуулийн 20.17 дугаар зүйл буюу "мөрийтэй тоглоом зохион байгуулах" гэмт хэрэгтэй тэмцэх чиглэлээр шалгалт явуулахад цагдаагийн алба хаагч Г.Тэмүүлэн нь хэргийн холбогдогчтой холбоотой байж болзошгүй нөхцөл байдлыг дотоод хяналтаар илрүүлж, тогтоосон ба хууль, журмын хүрээнд мөрдөн шалгах ажиллагаа үргэлжилж байна.

Уг хэрэгт Нийслэлийн Цагдаагийн газрын Хулгайлах гэмт хэрэгтэй тэмцэх тасгийн дарга, хурандаа М.Болдбаатар мөрийтэй тоглоомчдоос байнга мөнгө авч, хэргийг дардаг нь тогтоогдсон тул хэргийг АТГ-т шалгуулахаар шилжүүлжээ. Нийт 60 гаруй хэргийг шалгаж байна.

Цагдаагийн байгууллагын ажилтан оролцсон учраас энэхүү хэргийг нууцалж байгаа ч шалгалтын ажиллагаа үргэлжилж байна. Тэд мөрийтэй тоглоомоос зургаан тэрбум төгрөг олсон гэдгийг эх сурвалж мэдээлж байна. 

Цахим орчинд гадаад улсын төлбөртэй сайт болох Pokerrrr2 аппликейшн ашиглан хууль бус цахим мөрийтэй тоглоом зохион байгуулж иргэдийг эд хөрөнгө, цаг хугацаа, эрүүл мэндээр нь хохироож байгаа явдлууд гарсаар байгаа билээ.

Тус байгууллагаас энэ төрлийн гэмт хэрэгтэй тэмцэх зорилгоор энэ оны эхний 11 сарын байдлаар цахим орчинд хууль бус мөрийтэй тоглоом зохион байгуулсан 49 сайтын 3508 домэйн хаягийг Харилцаа холбооны зохицуулах хороотой хамтран Монгол улсаас хандах эрхийг хязгаарлуулж, нуугдмал хөрөнгө, хууль бус мөнгө байршуулсан байж болзошгүй 2254 харилцах дансыг холбогдох хууль, журмын хүрээнд хязгаарлуулан ажиллаж байна.