МСНЭ: Чөлөөт хэвлэлийг дарах, айлган сүрдүүлэх гэсэн үйлдэлд мэргэжлийн эрх ашгаа хамгаалж ажиллана

 Сэтгүүлч Н.Өнөрцэцэгийг цагдан хорьсонтой холбоотойгоор Сэтгүүлчдийн нэгдсэн эвлэл болон Zarig.mn сайтын редакциас өнөөдөр /2023.12.05/мэдээлэл хийлээ. 

 Монголын Сэтгүүлчдийн нэгдсэн эвлэлийн дэд Ерөнхийлөгч З.Боргилмаа “Н.Өнөрцэцэг сэтгүүлчийг анхан шатны шүүхээс хорих шаардлагагүй гэсэн шийдвэрийг өнгөрсөн долоо хоногт гаргасан. Гэтэл дахиад Прокурор эсэргүүцэл бичээд, Ерөнхий шүүгч хорих шийдвэр гаргажээ. Анхан шатны шүүхийн шийдвэрийг Ерөнхий шүүгч нь өөрчилдөг шийдвэр бодит байдалд ховор байдаг. Мөн шүүхийн захирамж танилцуулах, албадан авч явахаас эхлээд эмэгтэй хүнд харгис хандсан. Үндсэн хуулийн хүнлэг, энэрэнгүй зарчим алдагдсан. Цаад утгаараа чөлөөт хэвлэлийг дарах, айлган сүрдүүлэх байх гэсэн үйлдэл харагдаж байгаа учир сэтгүүлчид, Сэтгүүлчдийн нэгдсэн эвлэл мэргэжлийн эрх ашгаа хамгаалж ажиллана. Н.Өнөрцэцэг Эрүүгийн хэрэгт шалгагдаж байгаа тохиолдолд тухайн хүний хариуцлагыг бусдад нялзааж, хэвлэл мэдээллийн хэрэгслийг хааж эрхэнд нь халдсан.  Зөвхөн хувь сэтгүүлчийн эрхийг хязгаарлахын тулд Зариг.мн сайтад ажиллаж байгаа хэвлэн нийтлэх эрх чөлөө, дахиад иргэдийн мэдээллэх эрхийг хязгаарлаж байсан учир эсэргүүцээд Сэтгүүлчдийн нэгдсэн эвлэл, сэтгүүлчид ажилласан” гэв.