Шинээр томилогдсон СЕХ-ны гишүүд тангараг өргөлөө

УИХ-аас өчигдөр СЕХ-ны гишүүнээр томилогдсон УБЕГ-ын дарга Д.Дэлгэрсайхан, ЦЕГ-ын дарга Т.Сүхболд нар тангараг өргөлөө. Тэд “Үндсэн хууль, сонгуулийн хууль тогтоомжийг дээдлэн сахиж, Сонгуулийн ерөнхий хорооны гишүүний үүргээ шударгаар биелүүлэхээ батлан тангараглая” хэмээн тангараг өргөв.

Тангараг өргөсөн гишүүдэд СЕХ-ны гишүүний үнэмлэхийг УИХ-ын Төрийн байгуулалтын байнгын хорооны дарга Н.Энхболд гардуулан өглөө. Тэрээр "Ардчилсан чөлөөт сонгуулийн алтан дэнс, ард түмний засаглах эрхийн мөнхийн манаа болсон үйл хэрэгтээ бие даасан, хараат бус байдлыг бүрэн хангаж,  ил тод, шударга байх зарчмыг хэлбэрэлтгүй баримтална гэдэгт итгэлтэй байна. Ард иргэдийн шууд буюу төлөөлөгчдийн байгууллагаараа дамжуулан төрийн үйл хэрэгт оролцох, сонгох, сонгогдох эрхийг хэрэгжүүлэгч сонгуулийн төв байгууллагын үйл ажиллагаанаас олон нийтийн төрд итгэх итгэл төдийгүй улс орны бүрэн эрхт байдал хамаарна" гэв.