ОБЕГ: 15 тэрбум төгрөгөөр тусгай зориулалтын хувцас хэрэглэл, тоног төхөөрөмж авна

Онцгой байдлын Ерөнхий газраас аврагчдын хувцас хэрэглэл, хангамжийн талаарх мэдээллийг өглөө. Мэдээлэлд "Техник, тусгай зориулалтын хувцас хэрэглэл, өдөр тутмын хувцас хэрэглэл гэж ангилдаг. Техник хэрэгслүүдийн хувьд Польш, Беларусь, Францын өндөр чанартай техникүүдээр тоноглосон байгаа.  Өдөр тутмын хувцас хэрэглэлийг улсын төсөвт тавигдсан хөрөнгийн хэмжээгээр алба хаагчдад авч өгдөг. Бид өндөр үнэтэй, чанартай хувцас авч болох ч энэ хэмжээгээр худалдан авах гэхээр тоо нь багасдаг асуудал тулгардаг. Тийм учраас Монгол орны цаг агаарт тохирсон, боломжийн үнээр худалдаж авахыг зорьдог юм. Өнгөрсөн зуны үер усны аюулаас болж төсвийг нэмж өгсөн. Улсын төсвөөс 15 тэрбум төгрөгийг тусгай зориулалтын хувцас хэрэгсэл, тоног төхөөрөмжийг худалдан авахаар шийдвэрлэсэн байгаа. Одоо үзүүлж байгаа тусгай хувцас хэрэгсэл нийт алба хаагчдын 80 хувийг хангадаг" гэв.