Малчдын данс руу 710 мянган төгрөг шилжүүлж эхэлжээ

УОК-ын дарга, Шадар сайд С.Амарсайхан мэдээлэл хийх үеэрээ дараах зүйлийг ярилаа.

Тэрбээр "Иргэд олон нийт, олон улсын байгууллагаас өнөөдрийн байдлаар нийт 44 иргэн 26 аж ахуйн нэгж, 61 төрийн байгууллага, 23 ТББ, гадаадын нэг байгууллагаас нийт 3 тэрбум 171 сая 848 мянга 216 төгрөгийн хандив цугларсан.

 Мөн 805 сая төгрөгийн бараа материалын хандив ирүүлсэн. Үүнээс бид хүндрэлтэй аймаг, сумдад 701 сая төгрөгийн 41 мянга 484 ширхэг бараа бүтээгдэхүүнийг газар дээр нь хүргэж дууссан. Хандив, тусламжийн зарцуулалт хэрхэн хуваарилсан талаар маш тодорхой мэдээллийг цахим болон шилэн дансанд байршиж байгаа. Энэ мэдээллүүд зөрөх ёсгүй. Тусламжаар хүрч байгаа бараа дундаасаа замхарч, ах дүүдээ түрүүлж хүргэдэг зэрэг дутагдал гаргасан албан тушаалтан байвал УОК-ын шуурхай штабд баримттай мэдээлэл өгөхөд хяналт тавьж ажиллах болно.

Олон улсын хүмүүнлэгийн байгууллагын тусламж, дэмжлэгийн хүрээнд өнөөдрийн байдлаар 3 сая 249 мянган ам.долларын санхүүжилт босож, айл өрхүүдэд шууд хүргэж байгаа. Өөрөөр хэлбэл, айл өрхийн дансанд шууд бэлнээр хүргэгдэж байгаа. Цалин, орлого багатай малчин нэг өрхөд дунджаар 560 мянган төгрөг нэмээд өвс тэжээлийн 150 мянган төгрөг шилжүүлж байгаа. Өнөөдрийн байдлаар 11 мянга 134 зорилтот бүлгийн өрхүүдэд энэ хэмжээний бэлэн мөнгө өгөхөөр зохион байгуулагдаж байна. Олон улсын 20 гаруй донор байгууллагуудаас өгч буй уг тусламж дансанд нь орж байгаа эсэхийг өөрсдөө сайн нягталж бидэнд мэдээлэхийг хүсч байна" гэлээ.