Солонгост энгийн болон эрүүл мэндийн аялал жуулчлалын фестиваль 2024 зохион байгуулагдана

БНСУ-ын Аялал жуулчлалын төрийн өмчит корпорацаас Солонгост айлчлах жилийн (Visit Korea Year 2023-2024) хүрээнд 8-р сарын 30-наас 9-р сарын 2-ны өдрүүдэд Улаанбаатар болон Дархан хотуудад “K-Tourism Roadshow & K-Medical Tourism Festival 2024” (Энгийн болон Эрүүл Мэндийн Аялал Жуулчлалын Фестиваль) арга хэмжээг зохион байгуулах гэж байна.

Тус арга хэмжээ нь Солонгосын энгийн болон эрүүл мэндийн аялал жуулчлалын талаар мэдээлэл, зөвлөгөө олгож, төрөл бүрийн К-Контентуудаар дамжуулан Солонгосыг соёл, аялал жуулчлалыг таниулах цогц арга хэмжээ гэдгээрээ онцлог юм. Фестивалийн үеэр 8-р сарын 30-нд Шангри-ла зочид буудалд Солонгос-Монгол хоёр улсын аялал жуулчлалын байгууллагууд хамтын ажиллагааны санал солилцох бизнес уулзалт, 8-р сарын 31-ны өдөр Үндэсний цэцэрлэгт хүрээлэнд БНСУ руу аялах болон эмчилгээний зорилгоор зорчих хүсэлтэй иргэдэд мэдээлэл өгөх өдөрлөг, К-РОР тоглолт зэрэг арга хэмжээнүүд зохион байгуулагдана.

Харин 9-р сарын 1,2-ны өдрүүдэд БНСУ-аас хүрэлцэн ирж буй эрүүл мэндийн байгууллагын төлөөлөл Солонгосын эрүүл мэндийн аялал жуулчлалыг сонирхож буй Дархан хотын иргэдэд зөвлөгөө мэдээлэл өгөх өдөрлөгийг зохион байгуулах юм.

8-р сарын 31-ний оройн 19 цагт Үндэсний цэцэрлэгт хүрээлэнд зохион байгуулагдах К-РОР тоглолтод “Итэвон Класс” ОАК-ны “Эхлэл” (Start Over / Youtube үзэлт: 110 сая) дууг дуулсан олны танил дуучин Gaho, “Snow Flower” дуугаараа алдартай реппер “Paekboy”, Солонгосын уламжлалт хөгжмийн хамтлаг “Бёл-Ха” зэрэг Солонгосын уран бүтээлчид хүрэлцэн ирж K-POP урлагийг шимтэн сонсогч залуустай нэгэн үдшийг өнгөрөөх аж. Тоглолтын тасалбарыг shoppy.mn-ээс авах боломжтойгоос гадна тасалбарыг үнэгүй авах купон кодыг 8-р сарын 26 буюу өнөөдөр БНСУ-ын Аялал жуулчлалын төрийн өмчит корпорацын КТО Улаанбаатар төлөөлөгчийн газрын “KTO ULAANBAATAR” / https://www.facebook.com/KTOULAANBAATAR / албан ёсны фэйсбүүк хуудсаар дамжуулан задлах аж.

-Арга хэмжээний хүрээнд БНСУ-ын бүс нутгийн төлөөлөл, аялал жуулчлал болон эрүүл мэндийн байгууллагын 50 гаруй байгууллага Улаанбаатар хотод хүрэлцэн ирнэ