БНСУ-ын дуучин Ёнг Так Монгол улсыг олон улсад сурталчлах аялал жуулчлалын элч боллоо

БНСУ-ын нэрт дуучин Ёнг Так Байгаль орчин, аялал жуулчлалын сайд Б.Бат-Эрдэнийн урилгаар Монгол Улсад зочилж байна.

БНСУ-д 3 дугаар сард зохион байгуулсан "Go Mongolia" арга хэмжээнд хоёр орны уран бүтээлчид хамтран Монголын аялал жуулчлалын таван хөтөлбөрийг олон нийтэд танилцуулжээ. Энэ үеэр БНСУ-ын нэрт дуучин Ёнг Тагийг БОАЖ-ын Сайд Бат-Өлзийн Бат-Эрдэнэ Монгол Улсыг олон Улсад сурталчлах "АЯЛАЛ ЖУУЛЧЛАЛЫН ЭЛЧ" болох саналыг тавьж, урьсан нь ийнхүү ажил хэрэг боллоо. 

Дуучин Ёнг Так болон түүний энтертайнмент уг саналыг хүлээн авч гурав хоногийн хугацаатай Монгол Улсад зочилж "Аялал жуулчлалын элч" батламжаа өчигдөр БОАЖ-ын Сайд Б.Бат-Эрдэнээс гардан авсан байна. Түүний Монгол Улс дахь аялал "НЭГ ЖУУЛЧИНД НЭГ ХОНЬ" хөтөлбөрийн хүрээнд өрнөх юм.

Ёнг Так нь БНСУ-ын нийтийн дууны топ одуудын нэг бөгөөд ихэнх дуу нь Солонгосын хит дууны жагсаалтад багтдаг. Мөн монгол, солонгос жүжигчдийн хамтран тоглосон "Хүчирхэг охин Намсун" олон ангит кинонд тоглосон ба түүнээс хойш Монголын талаар илүү их сонирхож Монголд аялах хүсэлтэй болсон тухайгаа ярилцлагадаа дурдаж байв.

Түүний хит дуунууд нь "Youtube" сувагт 20-30 саяын үзэлттэй байдаг бөгөөд нийтийн дууны сонсогчдын дунд хамгийн их фентэй дуучдын тэргүүлэх эгнээнд ордог ажээ.