Шинэ оюутнуудад зориулсан “Rise” хөгжлийн хөтөлбөрийн нээлт Дархан хотод боллоо

Дассан сурсан сурагчийн ширээнээс холдож буй хэн бүхний хувьд оюутны амьдрал сонин содон басхүү эргэлзээ, асуултаар дүүрэн, дасан зохицоход амаргүй байдаг нь гарцаагүй. ХААН Банк сангаас нэгдүгээр курсийн оюутнуудад зориулан шинэ орчинд хурдан дасан зохицох, өөрийгөө хөгжүүлэх, амжилттай суралцах арга барилд сурахад нь дэмжлэг үзүүлэх зорилгоор RISE хөгжлийн хөтөлбөрийг хэрэгжүүлж, бүтэн жилийн турш олон сонирхолтой эвент, сургалт, хамтарсан арга хэмжээ зохион байгуулдаг билээ.

Тогтвортой хөгжлийн зорилтууд болох тэгш бус байдлыг бууруулах, чанартай боловсролыг дэмжих зорилгоор долоо дахь удаагийн “Rise” хөтөлбөрийг ийнхүү анх удаа залуусын хот гэгдэх Дархан-Уул аймагт зохион байгуулж буй нь хамгийн онцлог юм. 10-р сарын 26-ны өдөр болсон тус хөтөлбөрийн нээлтэд 500 гаруй шинэ оюутан оролцсон юм. RISE-ын нээлтийн арга хэмжээ бүхэлдээ Тогтвортой хөгжлийн зорилгуудыг дэмжиж, хэрхэн хүрээлэн буй орчиндоо ээлтэй байх тухай оюутнуудад мэдлэг, мэдээлэл хүргэж, байгаль дэлхийгээ хайрлахад уриалсан нь онцлууштай байлаа.

Тус арга хэмжээний нээлтийн үеэр ХААН Банкны Стратеги хариуцсан дэд захирал Ю.Төрмөнх оюутнуудад хандан хэлсэн үгэндээ “Оюутан гэж овоглох энэ цаг хугацаа та бүхний хувьд хамгийн чухал үе. Яагаад гэвэл та бүхэн энэ хугацаанд зөвхөн сурахын төлөө бүхий л хүчээ зарцуулж, өөрийгөө бүрэн дайчилж, эрдэм мэдлэгийн хүчээр өөрийгөө хүчирхэгжүүлж, ирээдүйгээ атгах хамгийн сайхан цаг үе. Ирээдүйн амьдралд чинь хамгийн чухал энэ үед нь туслах гэсэндээ, чиглүүлээд дэмжиж өгөх гэсэндээ өнөөдөр ХААН Банкны ах эгч нар нь энэхүү арга хэмжээг та бүхэнд тусгайлан зориулж байгаа юм” хэмээн онцолсон юм. Мөн амралтын өдөр мэдлэг мэдээллээр өөрийгөө цэнэглэхээр ирсэн залуус “Сурахуйд суралцахуй”, “Тогтвортой амьдралын хэв маяг” сэдвээр өрнөсөн сонирхолтой хэлэлцүүлгийг сонсож, илтгэгч залуустай чөлөөтэй яриа өрнүүлсэн юм.

Залуусын хувьд хамгийн хэрэгтэй, чухал мэдээллүүдийг нэг дороос, баталгаат эх сурвалжаас авч чадсан, үнэхээр хэрэгцээтэй, цаг үеэ олсон арга хэмжээ болсныг онцолж байлаа. Тухайлбал, Дархан-Уул аймгийн Эрүүл мэндийн газрынхан оюутнуудад эрүүл мэндийн үйлчилгээ хэрхэн авах тухай, EDEX компанийн хамт олон гадаад, дотоодын тэтгэлэгт хөтөлбөрүүдийн талаар нэгдсэн мэдээлэл өгч, амралтаараа Америкт сурч ажиллах боломжтой солилцооны хөтөлбөрийн талаар цогц мэдээлэл хүргэсэн юм. Мөн энэ үеэр зөвхөн оюутнуудад зориулсан, шимтгэлгүй, данс хөтөлсний хураамжгүй, байнгын болон онцгой хугацааны урамшуулалтай К карт болон гүйлгээний шимтгэлгүй Digi Pay аппликэйшний талаар ХААН Банкны ажилтнууд танилцуулж ажиллалаа. “Суралцъя, хөгжье” хэмээн уриалдаг энэхүү хөтөлбөрт хамрагдсанаараа залуус нээлтийн арга хэмжээнд оролцоод зогсохгүй бүтэн жилийн хугацаанд төрөл бүрийн хөгжлийн хөтөлбөрт оролцох боломжтой гэдгээрээ давуу талтай юм.       

Хамтын өсөлт төгөлдөр- ХААН Банк