Хүйтний улиралд ч дасгал хөдөлгөөнөө зогсоох ёсгүй

Дэлхийн бөмбөрцгийн хойд хагасын олон хэсэгт цаг агаар хүйтэрч байгаа ч хүйтэн цаг агаар нь дасгал сургуулилтаа зогсоох хэрэгтэй гэсэн үг биш бөгөөд ямар дасгал тохирох вэ гэдгийг сонгох нь чухал юм. Улирлаас үл хамааран насанд хүрэгчид долоо хоногт дунджаар 150 минут дунд зэргийн эрчимтэй биеийн тамирын дасгал хөдөлгөөн хийх шаардлагатай болохыг АНУ-ын Өвчний хяналт, урьдчилан сэргийлэх төвөөс мэдээлж байна. Дугуй унах, гүйх, теннис тоглох, цанаар гулгах зэрэг дасгалуудыг хийж болох юм. Мөн цас хүрздэх зэрэг гэр орны эрч хүч шаардсан ажлууд ч дасгалын тоонд орно гэдгийг онцолжээ.

Тогтмол дасгал хийдэг хүмүүс идэвхигүй амьдралын хэмнэлтэй хүмүүстэй харьцуулахад нас барах эрсдэл 31 хувь, зүрх судасны өвчнөөр өвчлөх эрсдэл 27 хувь, хорт хавдар тусах эрсдэл 12 хувиар бага гэсэн судалгааны дүн гарчээ. Ямар нэг шалтгаанаар хөдөлгөөнгүй байх нь эрүүл мэндэд сөрөг нөлөөллийг дагуулдаг учир өдөр бүр хөдөлгөөн хийх нь чухал. Хамгийн багадаа 10-15 минут хурдан алхах зэргээр дасгал хөдөлгөөнтэй байхыг чухалчлах шаардлагатайг эрдэмтэн судлаачид сануулсаар байна.  

Сүүлийн үеийн судалгаагаар ажил дээрээ голчлон суудаг хүмүүс тодорхой шалтгааны улмаас нас барах эрсдэл 16%-иар, зүрх судасны өвчнөөр өвчлөх эрсдэл 34%-иар өндөр байна гэсэн дүгнэлтэд хүрээд байгаа юм. Тиймээс эдгээр илүү хөдөлгөөнгүй хүмүүс ажил дээрээ илүү их хөдөлдөг хүмүүстэй харьцуулахад илүү их биеийн тамирын дасгал хийж, амьдралын хэв маягаа өөрчлөх хэрэгтэй.

Эх сурвалж: CNN