УДШ: Хөгжлийн банкны шүүх хуралд УИХ-ын гишүүн асан Ё.Баатарбилэг оролцож байна

"Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн анхан шатны шүүхээс УИХ-ын гишүүн Ё.Баатарбилэгийг “Улс төрд нөлөө бүхий этгээд үндэслэлгүй хөрөнгөжих, улс төрд нөлөө бүхий этгээд хахууль авах” гэсэн гэмт хэрэгт тус тус холбогдуулан гэм буруутайд тооцон, нийтийн албанд томилогдох эрхийг таван жилээр хасах, зургаан жил хорих ял оноосон байдаг. Өөрөөр хэлбэл, Хөгжлийн банкны хэрэгт холбогдоод байсан УИХ-ын гишүүдээс ганцхан Ё.Баатарбилэгийг гэм буруутайд тооцсон юм. Ингэснээр түүний хувьд парламентын түүхэнд бүрэн эрхийнхээ хугацаанд шүүхээс ял сонссон анхны гишүүн болж байсан юм. 

Тэгвэл УИХ-ын гишүүн Ё.Баатарбилэг анхан шатны шүүхийн шийдвэрийг эс зөвшөөрч давж заалдах гомдол гаргаж байв. 

Давж заалдах шатны шүүх хурал 2024 оны 3 дугаар сарын 22-ны өдөр болж Ё.Баатарбилэг нарт холбогдох хэргийн бүх асуудлыг дахин хэлэлцэх зайлшгүй шаардлагатай учраас хэргийг бүхэлд нь хүчингүй болгосон байдаг.  Тодруулбал, үндэслэлгүй хөрөнгөжсөнийг нарийвчилсан байдлаар дүгнээгүй, зээл нь байр худалдаж авахад цаг хугацаа нь таарч байгааг шалгаж, дүгнэх шаардлагатай. Үйл баримтыг нь батлаагүй гэж үзсэн юм. 

Өнөөдөр /2024.12.02/ Монгол Улсын дээд шүүхийн хяналтын шатны эрүүгийн хэргийн шүүх хуралдаанааар Хөгжлийн банкны гэх тодотголтой 540 хавтаст хэрэг бүхий 80 хүн, 4 хуулийн этгээдэд холбогдох хэргийг прокурорын эсэргүүцэл, шүүгдэгчид болон тэдний өмгөөлөгчдийн гаргасан 41 гомдлын хүрээнд хэлэлцэж байна.

Хуралд УИХ-ын гишүүн асан  Ё.Баатарбилэг,  өмгөөлөгч Г.Оюунцэцэгийн хамт оролцож байна.