Ураны төслийн Хөрөнгө оруулалтын гэрээнд өнөөдөр гарын үсэг зурна

Монгол, Францын хамтарсан "Бадрах Энержи" ХХК-ийн хөрөнгө оруулагч Орано Майнингкомпани хооронд байгуулах хөрөнгө оруулалтын гэрээний төслийг УИХ-аар хэлэлцэн баталсан.

Улмаар Монгол Улсын Засгийн газар, Франц Улсын “Орано Майнинг С.А.С” компанитай уран олборлох төслийн хөрөнгө оруулалтын гэрээнд өнөөдөр гарын үсэг зурах юм. Уг гэрээ нь Оюутолгой төслөөс хойш Монгол Улсад хийж байгаа томоохон хөрөнгө оруулалтын гэрээ болж байна. Уг гэрээг эрчимжүүлэхэд 2024 оны Франц, Монгол Улсын Ерөнхийлөгчийн айлчлал түлхэц болсон гэдгийг онцолж байгаа юм.

Ингэснээр Монгол Улс ураны зах зээлд түүхий эдээ нийлүүлэх боломж бүрдэж, уул уурхайн бүтээгдэхүүнээс олох орлогын хэмжээ нэмэгдэх юм. Хөрөнгө оруулалтын гэрээ зурагдснаар гадаадын хөрөнгө оруулагч нарыг татах, дараа дараагийн том хөрөнгө оруулалтын төслүүдийг эхлүүлэх том гарц нээгдэж байгаа гэж хэлж болно.

Энэ удаагийн Хөрөнгө оруулалтын гэрээнд Засгийн газар болон хөрөнгө оруулагч талд ногдох шууд үр өгөөжид тооцох орлогыг тусгайлан дурдаж, хэрэв Монголын талын шууд үр өгөөж 51 хувьд хүрэхгүй тохиолдолд Хөрөнгө оруулагч болон Төсөл хэрэгжүүлэгч компани нь үр өгөөжийг 51 хувьд хүргэхэд шаардлагатай үр өгөөж тохируулах нэмэлт төлбөрийг Засгийн газарт нөхөн төлөх үүрэгтэй.

Засгийн газар төсөл хэрэгжүүлэгч компанийн эздийн өмчийн 10 хувьтай тэнцэх төрийн эзэмшлийн давуу эрхийн хувьцааг үнэ төлбөргүй, шууд эзэмших ба хувь хэмжээг бууруулахгүй байх талаар гэрээнд тусгасан зэрэг давуу талуудыг тусгасан гэдгийг мэдээллээд байна.

Ийн Л.Оюун-Эрдэнийн Засгийн газар 14 том мега төслийн эхний төслөө хэрэгжүүлж эхлээд байна.