Х.Тэмүүжин: Ерөнхий сайд нь хүртэл худлаа ярьдаг асуудалд хариуцлага тооцдог байх ёстой

УИХ дахь Ардчилсан намын бүлгээс өнөөдөр /2025.04.28/ ээлжит мэдээллээ хийлээ.

УИХ дахь Ардчилсан намын бүлгийн дарга О.Цогтгэрэл:

-Ардчилсан намын бүлэг тавдугаар сарын 1-ний өдөр хуралдаж, Ерөнхий сайд цаашид УИХ-ын үйл ажиллагаанд оролцох эсэх талаар тодорхой байр сууриа илэрхийлэх нь зүйтэй гэж үзлээ.Ард түмний төлөөлөл болсон УИХ-ын гишүүн Ж.Баярмаагаас 5 сарын 1 -ээс өмнө ерөнхий сайд аман уучлалт гуйх ёстой. УИХ-аас томилогддог албан тушаалтан парламентын индэр дээрээс УИХ-ын гишүүнийг доромжилдог байж болохгүй. 

АН-ын бүлгийн дэд дарга Х.Тэмүүжин:

 Ерөнхий сайд Л.Оюун-Эрдэнэ УИХ-ын өмнө ажлаа хариуцан тайлагнадаг албан тушаалтан бөгөөд УИХ-аас томилогддог. УИХ-ын талбарыг Засгийн газрын суртал ухуулгын талбар болгохоос гадна тэр өдөр УИХ-ын гишүүдийг доромжилдог цаг болгон хувиргасан. Ерөнхий сайд Л.Оюун-Эрдэнэ энэ үйлдэлдээ УИХ-ын гишүүн Ж.Баярмаагаас чуулганы хуралдааны үеэр уучлалт гуйх ёстой. УИХ-ын дарга Д.Амарбаясгалан энэ ажлыг хариуцаж хийх ёстой. Эмэгтэй хүнийг доромжилж харьцаж болохгүй. Парламентын дарга тухайн үед нь арга хэмжээ авч чадаагүй бол одоо уучлалт гуйлгах хэрэгтэй. УИХ-ын толгой дээр гарч суудаг Ерөнхий сайдын суудлыг доош буулгах хэрэгтэй. Парламентын ардчиллыг бэхжүүлж, УИХ-ыг УИХ шиг байлгах ёстой.

Ерөнхий сайд нь хүртэл худлаа ярьдаг асуудалд хариуцлага тооцдог байх ёстой. Худал ярьж байгаа бол нийтийн албанаас чөлөөлж, хариуцлага тооцдог байх ёстой.