Залуу ээжүүд: Хүүхдийн мөнгийг боломжтой үедээ хадгалдаг. Арга ядсан үедээ хэрэглээнд зарцуулдаг

Манай улсын хувьд 2007 оноос эхлэн "Хүүхдийн мөнгөн тэтгэмж"-ийг хүүхэд бүрт тэгш олгож эхэлсэн. Хүүхдийн мөнгийг хүүхэд бүрд жигд олгох нь хүүхдийг ялгаварлан гадуурхагдах, гутаан доромжлуулахаас сэргийлдэг ба хүүхдийн эрх, нэр хүндэд халдахаас хамгаалж, тэгш байдлыг үүсгэдэг юм.  Хүүхдэд олгож буй мөнгөний 33 хувь нь хадгаламжид байршуулдаг бол үлдсэн 67 хувь бэлнээр авч ашигладаг гэх судалгаа бий.

Харин УИХ-ын гишүүн С.Цэнгүүн “Хүүхдийн мөнгийг больё гээд хэлчих зоригтой хүн байдаггүй. Үүнд зарцуулж буй нэг их наяд төгрөг зүгээр л хэрэглээний зардал болоод гарч байгаа. Энэ нь иргэдэд сайхан харагдаж байгаа ч өнөөдөр өгч буй 100 мянган төгрөгөөр дараа жил бараа, бүтээгдэхүүн худалдан авахаар ороход тор ч дүүргэж чадахгүй. Ийм л хиймэл мөнгө бид тарааж байгаа шүү дээ. Хүмүүст таалагдахгүй ч үүнийг бодитоор хэлээд зөв зам руу явахгүй бол манай улс Венесуэл шиг боллоо. Бүгд л зээлээр, хөнгөлөлттэй өгье гэх нэг л сайхан сэтгэлт, өгөөмөр төсөл хэрэгжүүлдэг улс. Гэтэл зах зээлийн хүүг бид хуурамчаар тогтоох боломжгүй. Иргэдэд бодитоор хэлдэг байх ёстой” гэх асуудлыг хөндсөн. Тэгвэл иргэдийн хувьд ''Хүүхдийн мөнгөн тэтгэмж"-ийг олгох нь зүйтэй гэдэг байр суурийг илэрхийллээ.