Угаарын хийн хордлогын 112 тохиолдол бүртгэгджээ

2025 оны 11-р сарын 11–24-ний хооронд улсын хэмжээнд нийт 112 иргэн угаарын хийн хордлогын улмаас эмнэлгийн тусламж авчээ.

Энэ хугацаанд бүртгэгдсэн тохиолдлын 47 хувь нь эрэгтэй, 53 хувь нь эмэгтэй байсан байна.

Хордлогын тохиолдол оршин суугчдын байршлаар авч үзвэл Баянгол, Сонгинохайрхан, Баянзүрх, Хан-Уул, Сүхбаатар, Чингэлтэй болон Налайх дүүргүүдээс илүү олон тохиолдол бүртгэгджээ.

Насны ангиллаар харвал ихэнх нь 19–64 насныхан байсан бөгөөд хүүхэд болон өндөр настнуудын хувьд ч тодорхой хувь эзэлж байна. Биеийн байдлын хувьд хөнгөн хэлбэрийн хордлого давамгайлсан бол зарим тохиолдолд дунд зэргийн хордлого илэрсэн байна.

Эрүүл мэндийн байгууллагууд иргэдэд дараах зөвлөмжийг өгч байна. Үүнд:
гэр ба байрны агааржуулалтыг сайтар хангах, пийшин зуух, яндангийн битүүмжлэл, ажиллагааг тогтмол шалгах, утаа мэдрэгч төхөөрөмж суурилуулах, мөн угаарын хийн хордлогын шинж тэмдэг илэрвэл яаралтай мэргэжлийн байгууллагад хандахыг анхааруулж байна.

Угаарын хийн хордлогын тандалтын 14 хоногийн тоон мэдээллийг Нийгмийн Эрүүл Мэндийн Төв- өөс хүргүүллээ.