Л.ГАНСҮХ: ШУДАРГА БУСЫН ХОНГИЛД ХЭЛМЭГДЭГСДИЙН ХОЛБОО БАЙГУУЛНА

Ерөнхий сайд асан Н.Алтанхуягийн зөвлөх байсан Л.Гансүх цаг үеийн асуудлаар мэдээлэл хийлээ.Тэрбээр шударга бусын хонгилоор явж, хэлмэгдсэн гэдгээ хэлэв. Шүүхийн байгууллага ялзарсан, хэсэг нэр бүхий шүүгч хэргийг шүүж, ялладаг байсан талаар ярилаа.Ингээд тэрбээр “Би “Цензургүй яриа” нэвтрүүлэгт орсны дараа надтай зургаан хүн ирж уулзсан. Эд нар бүгд Ц.Элбэгдорж болон Б.Хурц нарын бүтээсэн шударга бусын хонгилоор явж хэлмэгдсэн хүмүүс байна. Тиймээс тэдэнтэй хамтарч тэмцэхээр боллоо. Олон хүн шударга бусын хонгилоор явж хохирчээ. Миний хувьд бас хэлмэгдсэн. Тиймээс эхлээд шударга бусын хонгилоо нураах хэрэгтэй байна. Дараагийн шударга бус хонгилыг гаргахгүй төлөө тал талаасаа хичээж ажиллах ёстой. Шударга бусын хонгилд хэлмэгдэгсдийн холбоо байгуулна. Дахиад ийм хонгил бий болгохгүйн тулд хууль эрхзүйн орчныг нь шинэчлэх хэрэгтэй байна. Тодорхой дуу хоолойгоо нэгтгэх итгэл үнэмшил төрсөн учраас дээрх холбоог байгуулсан.Манай байгууллага шударга бусын хонгилоор орж хохирогч болсон хүмүүсийг хамтрахыг хүсч байна. Нэгдүгээр зорилго нь хилсээр хэлмэгдсэний хохирлоо олж авах, хэргийг нь шүүхээр цагаатгахын төлөө явна. Хоёрдугаарт шүүх, прокурор, АТГ, цагдаад шургалсан хонгилын гишүүд, тэдэнд олзлогдсон хүмүүсийг илчилж, холбогдох арга хэмжээг авахын төлөө төр засгийг шахаж ажиллана. Гуравдугаарт холбогдох хуулиудад өөрчлөлт оруулна.