ТУУЛ ГОЛД БОХИРОО ЦУТГАСАН АСЕМ ВИЛЛА ХОТХОНЫГ 5 САЯ ТӨГРӨГӨӨР ТОРГОЖЭЭ

Өнгөрсөн хоёрдугаар сард Асем вилла хотхоноос бохир алдагдаж Туул голд цутгасан асуудал үүссэн. Тухайн үед нийслэлийн Мэргэжлийн хяналтын газар, Туул голын сав газрын хамгаалалтын захиргаанаас шалгалт хийж, алдагдсан уснаас дээж авч шинжилгээнд хамруулсан.

Тэгвэл шинжилгээний хариу гарч, Асем вилла хотхоны ашиглалтыг хариуцдаг Мариот ХХК-г 5 сая төгрөгөөр торгожээ.

Хотхоноос ус алдагдсан асуудлын талаар тухайн компаниас "Бохир алдагдаагүй. Цэвэр усны шугам задарснаа 50 метр квадрат газарт мөсөн бүрхүүл тогтсон. Гэхдээ алдагдсан ус Туул голд цутгаагүй" гэсэн тайлбарыг өгч байсан юм. Ингээд хөлдсөн мөс, шавар шавхайг ачиж, "Скай ресорт" цанын баазын орчимд асгасныг Баянзүрх дүүргийн иргэдийн төлөөлөгчид шаардлага хүргүүлэн, дахин ачуулж хогийн цэгт хүргүүлж байсан юм.

Нэг байр нь 3-4 тэрбум төгрөгөөр зарагдсан гэж яригддаг Асем вилла хотхонд 53 айл амьдардаг байна.