29 НАСТАЙ ЭМЭГТЭЙД МЭС ЗАСАЛ ХИЙСЭН "ТОД КАННАМ" ЭМНЭЛЭГ МЭРГЭЖЛИЙН ЭМЧГҮЙ БАЙЖЭЭ

Нийслэлийн Хан-Уул дүүргийн 15-р хорооны нутаг дэвсгэрт байрлах "Тод Каннам" арьс гоо заслын эмнэлэгт 2019 оны гуравдугаар сарын 26-ны өдөр гоо сайхны хагалгаанд орсон эмэгтэй нас барсан хэрэг гарсан.

29 настай эмэгтэй гоо сайхны өөх соруулах хагалгаанд орж байгаад зүрх нь зогсож улмаар яаралтай түргэн тусламжаар Улсын нэгдсэн нэгдүгээр эмнэлгийн Эрчимт эмчилгээний тасагт хэвтэн эмчлэгдэж байгаад дөрөвдүгээр сарын 01-ний өдөр нас барсан байна. Уг хэргийг Хан-Уул дүүргийн цагдаагийн нэгдүгээр хэлтэст шалгаж байгаа бөгөөд тус гоо сайхны мэс засал хийсэн эмнэлэгт шалгалт явуулж байгаа юм.

Талийгаач О нь Эрдэнэт хотод оршин суудаг бөгөөд Улаанбаатар хотод өөхөө соруулахаар ирээд удаагүй хагалгаанд оржээ. Тэрбээр хагалгаанд орохдоо хэсэгчлэн мэдээгүйжүүлэлттэй орсон боловч түүнд бага зэрэг өвдөлт мэдрэгдэж эхлэхэд нь эмч нарын зүгээс унтуулах арга хэмжээ авчээ. Харамсалтай нь хагалгаа дуусах шатанд талийгаачийн зүрх зогсч, яаралтай түргэн тусламжаар Улсын нэгдсэн нэгдүгээр эмнэлэгт хүргэсэн юм байна.

Бүсгүй биеийнхээ хэвлийн хэсгийг галбиржуулах зорилгоор хагалгаанд орсон нь энэ юм. Тус эмнэлэг нь Монгол Улсад 2013 оноос эхлэн эмчилгээний гоо сайхны нөхөн сэргээх үйлчилгээ явуулах чиглэлээр үйл ажиллагаа явуулж эхэлжээ.

Нийслэлийн мэргэжлийн хяналтын газраас гоо сайхны эмнэлгүүдэд төлөвлөгөөт шалгалтыг өнгөрөгч сард явуулахад "Тод Каннам" эмнэлгээс ноцтой гурван зөрчил илэрч, үйл ажиллагааг нь түдгэлзүүлэх саналыг Нийслэлийн эрүүл мэндийн газарт хүргүүлсэн байна.