ХЯТАД ХАРИУ ЦОХИЛТ ӨГӨВ

АНУ ба БНХАУ хоорондын худалдааны дайн ширүүссээр. Америкийг Хятадын бараануудад 200 тэрбум долларын нэмэлт татвар ногдуулж, “Huawei” компанийг “Android” үйлдлийн систем ашиглахыг хориглосны дараагаар Хятад нь хэд хэдэн хариу арга хэмжээ авлаа. Эхний ээлжинд Америкаас импортлосон бараануудад 60 тэрбум долларын нэмэлт татвар ногдуулсан бол дараа нь Америкаас шар буурцаг худалдан авахаа зогсоосон байна.

БНХАУ нь шар буурцагны дэлхийд тэргүүлэгч импортлогч орон юм. Хятад руу шар буурцаг импортлогч гол улсуудын нэг нь АНУ. 2017 онд гэхэд л БНХАУ нь Америкийн шар буурцагны экспортын 60 хувийг худалдан авч байжээ. 2018 оны арванхоёрдугаар сард БНХАУ нь АНУ-аас 13 сая тонн шар буурцаг импортлож байсан бол он сүүлийн үед шинэ захиалга өгөхөө зогсоосон нь худалдааны дайнд Америкт өгч байгаа хариу цохилт болов. Хоёрдугаар сард Хятад нь Америкаас 10 сая тонн шар буурцаг худалдан авахаар тохиролцоод байсан ч худалдааны дайнаас болж авахаас татгалзжээ.

Үүнээс болоод Америкийн хөдөө аж ахуйн салбар асар их хохирол амсахад хүрээд байна. Ийм нөхцөлд Америкийн Засгийн газар нь алдагдал хүлээгээд байгаа фермерийн аж ахуйнуудад нөхөн олговор олгох асуудлыг авч үзэж байгаа аж.

Б.Бадрал