СИ ЖИНПИНЬ ОРОСТ АЙЛЧИЛЖ БАЙНА

БНХАУ-ын тэргүүлэгч Си Жинпинь өнөөдөр Москвад албан ёсны айлчлал хийж байна. Тэрээр айлчлал эхлэхийн өмнө Оросын хэвлэл мэдээллийн төлөөлөлтэй уулзан ярилцлага өгчээ. Энэ ярилцлагын үеэр тэрээр Оросын Ерөнхийлөгч Путинтэй 30 гаруй удаа уулзаж

байгаа нь хоёр орны цаашдын хамтын ажиллагааны чиг хандлагыг тодорхойлж өгч байна гэжээ. Улмаар Хятад Оросын хооронд дипломат харилцаа тогттоосны 70 жилийн босгон дээр хоёр орны харилцан итгэлцэл, түншлэл өмнө нь байгаагүй өндөр түвшинд хүрсэн гэв. Хоёр улс хоорондын бараа таваарын эргэлт өнгөрсөн жилд 100 тэрбум ам.долларт хүрч дээд амжилт тогтоосон, эрчим хүч, нисэх онгоц үйлдвэрлэл, сансар судлал зэрэг салбаруудад хамтарсан олон төсөл хэрэгжүүлж байгаа, “Нэг бүс-нэг зам” төслийг Евразийн эдийн засгийн холбооны чиг зорилготой уялдуулан холбосон гээд олон эерэг амжилт гарсаныг Си Жинпинь онцолсон байна.

Цаашлаад Орос Хятадын хамтын ажиллагаа нь олон улсын түвшинд чухал ач холбогдолтой тул НҮБ, “Их хорь”, “BRICS”, Шанхай хамтын ажиллагааны байгууллага зэргийн хүрээнд дэлхийн нийтийн чухал асуудлыг шийдэхэд хамтын хүчин чармайлт гаргаж байгааг дурджээ. Си Жинпиний Орост хийх айлчлал энэ сарын 7-н хүртэл үргэлжлэх юм.