ПОЛЬШИЙН ЗАСГИЙН ГАЗАР ТАГНУУЛЧДЫНХАА ТУХАЙ МЭДЭЭЛЛИЙГ АМЕРИКЧУУДАД ӨГЧЭЭ

Польшийн Засгийн газар өөрийн тагнуулын газарт өндөр албан тушаал хашч байсан хоёр офицерийн үйл ажиллагааны талаарх маш нууц мэдээллийг АНУ-ын холбогдох байгууллагын хүмүүст өөрийн хүсэлтээр өгсөн тухай “gazeta.pl” сайт мэдээлэв. Энэ хоёр тагнуулч нь хуучин коммунист Польшийн үед тагнуулын байгууллагад ажиллаж байгаад 1990-ээд онд Польшийг ардчилсан улс болоход тагнуулын шинэ алба байгуулахад хүчин зүтгэж байжээ. Ингээд зогсохгүй АНУ-ын тусгай албадтай хамтран ажиллаж, үүнийхээ төлөө одонгоор ч шагнуулж байсан хүмүүс юм байна.

Гэвч Польшид эрх барьж буй “Эрх чөлөө ба Шударга ёс” нам нь хуучин коммунист засаглалын үед хууль сахиулах албадад ажиллаж байсан хүмүүсийн тэтгэврийг багасгах хууль санаачлан баталж, энэхүү хуулийнхаа хүрээнд эдгээр маш нууц мэдээллийг америкчуудад өгсөн гэнэ.

Америкчууд ийм нууц мэдээлэл авч байгаадаа ихэд гайхсан тухай Польшийн “Хууль зүйн сонин” мэдээлээд үүнийг “урьд хожид гарч байгаагүй зүйл” гэжээ. Польшийн тагнуулын албаны ахмад ажилтнуудын талаарх маш нууц мэдээллийг АНУ-д өгсөн явдал Польшийн нийгэмд ихээхэн дургүйцэл, бухимдал үүсгэжээ. Тухайлбал, Польшийн Гадаад харилцааны сайд асан Р.Сикорский нь эрх баригч намын энэ үйлдлийг “тэнэг зусардалт” гэсэн бол Дотоод яамны сайн асан Б.Сенкевич нь “Хэрэв энэ мэдээ үнэн бол төрөөс урвасан хэрэг” гэжээ. 2013-2016 онуудад АНУ дахь Польшийн цэргийн атташегаар ажиллаж байсан генерал Ч.Сторожик нь “1990 оноос хойш тусгай албанд ажиллаж байсан офицерүүдийн тухай мэдээллийг хэн нэгэнд өгнө гэдэг нь байж боломгүй зүйл” гэжээ.