ХОНКОНГТ ЭСЭРГҮҮЦЛИЙН ЖАГСААЛД 2 САЯ ХҮН ОРОЛЦОВ

Их газрын Хятадад гэмт хэргийн сэжигтнүүдийг шилжүүлэх хуулийг эсэргүүцсэн ээлжит удаагийн жагсаалд 2 сая хүн оролцсон гэж зохион байгуулагчид зарласан тухай ТАСС мэдээлж байна. Энэ удаагийн жагсаал нь цагдаа нартай мөргөлдөөн үүсгэлгүй тайван явагдсан гэдгээрээ өмнөх жагсаалуудаас эрс ялгарч байжээ. Жагсагчид цагдаа нарыг өдөөн хатгаагүй, зорчигч тээврийн автобус ба түргэн тусламжийн машин явах замыг чөлөөлөн туйлын эмх журамтай жагссан аж.

Хонконгийн Засгийн газрын тэргүүн Кэрри Лам нь өөртөө засах орныхоо иргэдэд хандан олон нийтийн дургүйцлийг хүргэсэн сэжигтэн шилжүүлэх уулийг батлах гэж оролдон хямрал үүсгэсэндээ хүлцэл өчжээ. Хонконгийн удирдлагаас хямралыг эхлүүлсэн хуулийн төслийг авч хэлэлцэхээ зогсоож байгаагаа бямба гарагт албан ёсоор зарласан хэдий ч жагсагчид нь энэхүү хуулийг батлахаас нэгмөр татгалзахыг шаардсан байна. Мөн өнгөрсөн лхагва гарагт болсон жагсаалын үеэр Хууль тогтоох зөвлөлийн ордон руу дайран эзлэх гэсэн хүмүүсийн эсрэг нулимс асгаруулагч хий, резинэн сум ашигласан цагдаа нарыг хэтэрхий ширүүн байна гэж шүүмжилж. Түүнчлэн Бээжин нь 2047 он хүртэл “Нэг улс – хоёр систем” гэсэн зарчмын дагуу өөртөө засах өргөн эрх олгохоор баталсан атлаа Хонконгийн дотоод хэрэгт улам бүр оролцож байгаад сэтгэл зовниж байгаагаа илэрхийлжээ.