Оффшор компаниудын жинхэнэ эздийг ил болгоно

Нэгдсэн вант улсын Засгийн газар нь Британийн далайн чанад дах газар нутагт бүртгүүлсэн компаниудын жинхэнэ эздийн талаарх мэдээллийг ил тод мэдээлж байх хууль санаачилсан байна. Британийн далайн чанад дах газар нутаг гэдэг 14 газар нутаг нь Их Британийн мэдэлд байдаг ч өөрсдийн Засгийн газар, дотоод хууль дүрэмтэй арлууд. Газар нутаг жижиг, эдийн засаг сул дорой тул эдгээр арлууд нь оффшор бүс бий болгох замаар орлого олж байдаг. Кайманы арлууд, Британийн Виргинийн арлууд, Гибралтар, Монтсератт, Мэн арал, Нормандын арлууд, Ангилья, Бермудын арлууд гэх мэт алдартай оффшор бүс юм.

Шинэ хуулийг эдгээр нутгийн Засгийн газрууд дэмжсэний дараагаар хэрэгжиж эхэлбэл, 2023 оноос тус оффшор бүст байрласан компаниудыг үндсэн эзэд, ашиг хүртэгчдийн талаарх мэдээллийг олон нийтэд ил болгоно. Харин одоохондоо бол эдгээр оффшор бүс нь тэнд бүртгэлтэй компаниудын жинхэнэ эздийг нууцлах үүрэгтэй бөгөөд зөвхөн Их Британийн хууль сахиулын байгууллагын шаардлагаар л ийм мэдээллийг өгдөг.

Британийн Засгийн газрын санаачилгыг ихэнх оффшор нь хүлээн зөвшөөрч, дэмжиж байгаа юм байна. Үүнийг Их Британийн Засгийн газраас хууль бус санхүүгийн үйл ажиллагаатай тэмцэх, Нэгдсэн вант улсын түнш орнуудтай хамтран ажиллахад бэлэн гэдгээ харуулсан алхам гэж өндрөөр үнэлж байгаа аж.