Вакцин үйлдвэрлэгчдийг гомдол заргын эсрэг дархлаатай болгожээ

АНУ-ыг эрх баригчид корона вирусийн эсрэг вакцин бүтээн үйлдвэрлэж байгаа “Pfizer” болон “Moderna” компаниудыг вакцинжуулах явцад үүссэн ноцтой гаж нөлөөнөөс үүдэх хариуцлагаас чөлөөлж, “дархлаажуулсан” тухай “CNBC” суваг мэдээлжээ.

АНУ-ын Эрүүл мэнд ба нийгмийн халамжийн сайд АлексАзар нь нэн чухал эмнэлгийн бараа, түүний дотор вакцин ба эм үйлдвэрлэгч компаниудад санаатайгаар хууль бус үйлдэл хийснээс бусад тохиолдолд хууль зүйн хамгаалалт өгч болно гэсэн 2005 оны хуулийг хэрэглэсэн юм байна. Ингэснээр нэр заагдсан компаниуд нь дараагийн дөрвөн жилийн туршид бүтээгдэхүүнийг нь корона вирусийн халдвараас хамгаалах эсвэл эмчлэх явцад эрүүл мэндэд хохирол учирсан тохиолдолд шүүхээс хариуцлагад татагдахгүй. 

Аюулт өвчний эсрэг вакцин асар богино хугацаанд боловсруулах шаардлагатай болсон, мөн вакциныг хямд үнээр зах зээлд нийлүүлэх шаардлагатай болсон тул төрийн зүгээс үйлдвэрлэгчдээ ийнхүү хамгаалж байгаа юм байна. Түүнчлэн вакциныг хэрэглэх зөвшөөрөл олгосон АНУ-ын Хүнс ба эмийн бүтээгдэхүүний чанарын албыг ч вакцины гаж нөлөөний төлөө шүүхэд дуудаж хариуцлага ногдуулах боломжгүй болох юм байна.