Англи: Илүү халдвартай коронавирус илэрсэн тул хориог чангатгана

Англид корона вирусийн өмнөхөөсөө 70 хувиар илүү халдвартай хувилбар хурдацтай тархаж байгаагаас үүдэн хөл хорио, хязгаарлалтын горимыг шинэчлэх шийдвэр гаргасан тухай Их Британийн Ерөний сайд Борис Жонсон мэдэгдэв.

Улмаар одоо халдварын тархалт хүнд байгаа Лондоны зарим дүүрэг, Английн зүүн өмнөд нутагт хязгаарлалтыг дөрөвдүгээр түвшин хүртэл нэмэгдүүлэхээр болсон байна. Үүнээс өмнө Их Британид хязгаарлалтын хамгийн дээд түвшин гуравдугаар зэрэглэлтэй байсан. Энэхүү шинэ дөрөвдүгээр зэрэглэлийн хязгаарлалтыг нэвтрүүлснээр 20 сая гаруй хүн амьдардаг бүс нутагт хүмүүсийг онцын шаардлагагүй тохиолдолд гэрээс гарах ба улсын дотоодод болон хилийн чанад руу аялахыг хориглосон, гуравдугаар түвшний хязгаарлалтын үед ажиллаж байсан үсчин, паб, дамжаа, фитнес, зоогийн газруудыг хаасан, нэн тэргүүнд шаардлагатай зүйлс арилждагаас бусад дэлгүүрүүдийг хаасан байна. 

Корона вирусийн шинэ мутациас болоод  Их Британи даяар хязгаарлалтыг суллана гэж байснаа цуцалсан байна.Одоо хүмүүс баярыг зөвхөн гэр бүлийн хүрээнд тэмдэглэхийг зөвшөөрч, нэгнийдээ айлчлах, зочид урихыг хоригложээ. 

Энэ бүх хориг арга хэмжээг бизнес эрхлэгчид эрс шүүмжилж, хамгийн их борлуулалттай байдаг баярын худалдааг хүлээж байсан бизнес эрхлэгчдэд нөхөн төлбөр, тусламж олгох асуудлыг нэн даруй шийдэхийг эрх баригчдадаа уриалжээ. Улмаар жижиглэн худалдааны газрууд энэ бүх хориг, хязгаарлалтаас болж долоо хоног бүр 2 тэрбум фунтын алдагдал хүлээж, олон мянган хүн ажлаа алдах дээрээ тулаад байгааг анхааруулсан байна.