2021 оны 1 дүгээр сарын 30-ний өдрийн ЭМЯ-аас өгсөн мэдээллээр Дорноговь аймагт нийслэлээс замын ажил хийхээр очсон хүний шинжилгээний хариу түргэвчилсэн оношлуураар эерэг гарч, PCR шинжилгээгээр баталгаажсан тухай мэдээлсэн. Батлагдсан тохиолдлын явсан маршрутыг олон нийтэд зарлахдаа Нэгдүгээр сарын 29-нд нийслэлээс Сайншанд руу ирэх замдаа 14.00-16.00 цагийн хооронд Говьсүмбэр аймгийн “Гоё амтат зоог” хоолны газарт хоол идсэн тухай мөн мэдээлж байсан. Гэтэл энэ цаг хугацаанд нь "Гоё амтат зоог" хоолны газарт Говьсүмбэр аймгийн нэгдсэн эмнэлэгийн эмчилгээ эрхлэгч орлогч дарга Б. Цэцэгмаа нь эмнэлэгт хэвтэн эмчлүүлж байсан өөрийн танилаа хоолоор дайлж, эмнэлэгээс авч гарч батлагдсан тохиолдолтой таарсан байна. Эмнэлэгийн байгууллага халдвар хамгааллын дэглэм барьж, хэвтэн эмчлүүлэгдэд цагийн хуваарьтайгаар эргэлт оруулах зохицуулалттай явж байгаа атал эмнэлэгийн байгууллагын удирдлага нь ийнхүү хорио цээрийн дэглэм зөрчсөнөөс үүдэн Нэгдсэн эмнэлэгийн дотрын тасгийн 30 орчим хүн, хавьталд орсон эмнэлэгийн ажилчид, удирдлагууд тусгаарлалтад орж эмнэлэгт ажиллах хүн хүчгүй болсон байна. Энэ талаар Говьсүмбэр аймгийн Нэгдсэн эмнэлэгийн дарга, тасгийн эрхлэгч, аймгийн ЗДТГ-ын Нийгмийн бодлогын хэлтсээс тодруулах гэсэн боловч мэдээлэл өгөх боломжгүй хэмээсэн юм.
Сэтгэгдэл (0)
Сэтгэгдэл бичигдээгүй байна