Улсын онцгой комиссын Шуурхай ажлын хэсэг /2021.02.23/ хуралдаж Гамшгаас хамгаалах бүх нийтийн бэлэн байдлын зэрэгт шилжсэн үед авч хэрэгжүүлсэн “Нэг хаалга-Нэг шинжилгээ”-ний нэгдсэн тайланг хэлэлцсэн байна. Шинжилгээгээр нийт халдварын 122 тохиолдол, 33 далд голомтыг илрүүлсэн байна. Монгол Улсын Шадар сайд, Улсын онцгой комиссын дарга С.Амарсайхан хэлэхдээ "Энэ нь голомтыг хумьж, тархалтыг бүрэн зогсоосон гэсэн үг биш. Иймээс иргэд, аж ахуйн нэгж, байгууллагуудад халдвар хамгааллын дэглэмийг дээд зэргээр сахиулах нь зүйтэй гэж үзлээ. Цаашид нийслэл , аймаг орон нутагт хэрэгжүүлэх арга хэмжээний зохион байгуулалт, эрсдлийн үнэлгээ, автозамын хяналтын нэгдсэн цахим системд шилжих зэрэгт анхаарах хэрэгтэй" гэдгийг сануулан хэлсэн байна. Мөн иргэдэд аливаа мэдээ, мэдээллийг үнэн зөв, хоёрдмол утгагүй хүргэж байхыг үүрэг болгосон ба "Нэг хаалга-Нэг шинжилгээ"-тэй холбоотой нэгдсэн тайланг өнөөдөр нийтэд мэдээллэх аж.