Өнгөрөгч оны зургаадугаар сараас хойш өсвөр насны хөвгүүд бага насны хүүг удаа дараа хүчирхийлсэн хэрэг Хүүхэд, залуучуудын сургалт хүмүүжлийн тусгай цогцолборт гарсан юм. Уг хэргийг хуулийн байгууллага шалгаж байгаа хэдий ч уг төв болон хүүхэд хамгааллын бусад төв, асрамжийн газруудад хяналт шалгалт оруулах, хүүхдүүдийн сэтгэл зүйн байдал, амьдрах орчин зэргийг харгалзан үзэх нь зайлшгүй хэмээн "Хүчирхийллийн төлөө Нэгд" аяныг зохион байгуулагч Э.Цэцэгсайхан хоёрдугаар сарын 23-ний өдөр Нийслэлийн Засаг дарга бөгөөд Улаанбаатар хотын захирагч Д.Сумъяабазарт ажлын тав хоногт эргэн хариу мэдэгдэх шаардлагыг хүргүүлсэн. Тэгвэл үүний дагуу Хүүхэд, залуучуудын сургалт хүмүүжлийн тусгай цогцолборт Улаанбаатар хотын захирагч Д.Сумъяабазар ажиллаж, хүүхдүүдийн амьдрах орчин, сурч боловсорч буй нөхцөлтэй танилцаж, холбогдох албаныханд үүрэг, чиглэл өгсөн байна. Тэрээр "Өнгөрсөн оны 12 дугаар сард гарсан асуудалд тус төвийн удирдлагуудаас тайлбар нэхэж, хариуцсан газарт нь ийм асуудал гарсан нь хариуцлагагүй байдалтай шууд холбоотой" хэмээгээд "Та нарын ажлын алдаа бол энэ олон хүүхдэд тулж ажиллах, сурган хүмүүжүүлэх, соён гэгээрүүлэх үүрэгтэй албан хаагчид дутмаг байгаатай холбоотой. Дахин ийм асуудал энэ төвөөс гарах ёсгүй шүү” гэдгийг хэлсэн байна.
Уг хэргээс үүдэн тус төвийн дарга хэлэхдээ "Ажлын хэсэг ажиллан, хүчирхийлэлд өртсөн хүүг хүүхэд хамгаалах төвд хүргэн, сэтгэлзүйн засал эмчилгээ хийх арга хэмжээ авсан. Мөн уг хэрэгт холбогдсон өсвөр насны хоёр хүүг мөн соён гэгээрүүлэх, төлөвшүүлэх чиглэлд ажиллаж байгаа"-хэмээсэн байна.
0°C
Сэтгэгдэл (420)