Дөрвөн үеийн америкчуудын бэлгийн чиг хандлагын талаарх судалгааг “Ipsos” олон нийтэд хүргэжээ. Тус судалгаанд “Бэби бумер үеийнхэн” (1946-1964 оныхон), “X үеийнхэн” (1965-1980 оныхон), “Миллениал буюу Y үеийнхэн” (1981-1996 оныхон.), “Z үеийнхэн” (1997-2012 оныхон) гэсэн дөрвөн үеийг хамруулжээ.
Судалгаанаас үзвэл америкчуудын дийлэнх нь өөрсдийгөө “эр”, “эм” хүйстэй гэж тодорхой адилтгадаг бол ердөө 1 хувь нь өөрсдийгөө “трансгендер” гэж үздэг. Үүн дотроо Х үеийнхэн ба бэби-бумер үеийнхэн дунд өөрсдийгөө “трансжендер” гэж үздэг хүн огт байхгүй бол “Z” үеийнхэнд ийм хүмүүсийн эзлэх хувьд шууд 2 хувь болж байж.
Цаашлаад асуулгад оролцсон хүмүүсийн 82 хувь нь өөрсдийгөө гетеросекс буюу эсрэг хүйстнээ сонирхдог гэсэн бол 6 хувь нь бисексуал, 2 хувь ижил хүйстнээ сонирхдог гэсэн байна. Мөн ахин 2 хувь нь бэлгийн өөр чиг хандлагатай гэхдээ яг ямар чиг гэдгээ мэддэггүй гэсэн бол 3 хувь нь энэ асуултад хариулахаас татгалзсан.
Гэхдээ залуусын дунд бэлгийн чиг хандлагаа нарийвчлан тодорхойлох явдал маш өндөр байгааг судалгаа харуулсан. Тодруулбал, бэби-бумер үеийнхний 91 хувь хэвийн, 4 хувь бисекс, 1 хувь нь ижил хүйстнээ сонирхдог гээд “асекс”, “пансекс”, “омнисекс” гэж өөрсдийгөө тодорхойлох хүн гарч ирээгүй. Гэтэл “Z” үеийн хүмүүсийн 15 хувь нь өөрсдийгөө бисекс, 9 хувь асекс, 3 ижил хүйстнээ сонирхдог, 5 хувь нь бэлгийн бусад чиг хандлагатай гэсэн. Ингэж явсаар “Z” үеийн хүмүүсийн ердөө 54 хувь нь бэлгийн хэвийн чиг хандлагатай гэж өөрсдийгөө тодорхойлсон байна.
Бэби-бумер үеийнхэн дунд зөвхөн эсрэг хүйстнээ сонирхогчид нь 84 хувь байсан бол сексийн ийм сонирхолтой хүмүүсийн эзлэх хувь “Х” үеийнхэн дунд 76 болж буураад, Миллениал үеийнхэнд 60 хувь хүртэл багасаад, Z үеийнхэн дунд бүр 52 хувь болж багассан байна.
Сэтгэгдэл (0)
Сэтгэгдэл бичигдээгүй байна