Нийслэлийн удирдах ажилтнуудын шуурхай зөвлөгөөн өнөөдөр /2021.03.15/ боллоо. Хоёрдугаар сарын 23-наас хойш үйл ажиллагаагаа хэвийн явуулж эхэлсэн аж ахуйн нэгжүүдэд халдвар хамгааллын дүрэм, журам мөрдүүлэх тал дээр арга зүйн зөвлөгөө өгч ажиллахыг НМХГ-т үүрэг болгосон байна. Энэ дагуу өнгөрсөн хугацаанд НМХГ-аас хяналт, шалгалтын арга хэмжээг зохион байгуулж, зөрчлийг арилгуулах чиглэлээр арга зүйн зөвлөгөө өгч ажиллажээ.
Тухайлбал, хяналт шалгалтаар цэнгээний газруудад хүн хоорондын зай барихгүй, видео тоглоомын газарт амны хаалт зүүхгүй, тоглоомын газрыг тухай бүр ариутгадаггүй зөрчил нийтлэг илэрснийг арилгуулж, агаар сэлгэлт, гар ариутгал, бүртгэл хөтлөлтийг тогтмолжуулж, үйлчлүүлэгчдэд шаардлага тавьж ажиллахыг зөвлөсөн байна.
Мөн QR код бүртгүүлэхэд дата шаардлагагүй гэдгийг иргэд тэр бүр мэддэггүй учраас датагүй гээд уншуулдаггүй. Иймд дата шаардахгүй гэдгийг жишээн дээр үзүүлэн тайлбарлаж, ажилласан байна.
Засгийн газрын тогтоол, Нийслэлийн Засаг даргын захирамжийн дагуу 2021 оны хоёрдугаар сарын 26-ны өдрийн 06:00 цагаас гуравдугаар сарын 12-ны өдрийн 06:00 цагийн байдлаар нийслэл рүү 23258 тээврийн хэрэгсэлтэй 52348 хүн орж, 31854 тээврийн хэрэгсэлтэй 76292 хүн гарсан байна.
Нийслэлийн Засаг дарга бөгөөд Улаанбаатар хотын захирагч Д.Сумъяабазар хэд хэдэн үүрэг, даалгавар өгсөн нь Улаанбаатар хотыг өнгө, үзэмжгүй харагдуулдаг, иргэдийн аюулгүй зорчих боломжийг хязгаарлаж, явган хүний зам руу түрж барьсан зөвшөөрөлгүй хашаа, хайсыг буулгах арга хэмжээ авахыг холбогдох албаныханд үүрэг болгожээ.
Тэрбээр “Улаанбаатар хотын иргэд гудамжаараа чөлөөтэй, аюулгүй явах боломжийг хангах ёстой” гэсэн юм. Мөн хувиараа хөдөлмөр эрхэлж байгаа хүмүүсийг бүх талаас нь дэмжихийг үүрэг болгож, төрийн албаны хүнд суртал гаргахгүй байх тал дээр анхаарч ажиллахыг даалгасан байна.
Харин хоол, хүнсний худалдаа эрхлэгчдэд аюулгүй, эрүүл ахуйн үндсэн шаардлагуудыг тавьж, арга зүйн зөвлөгөө өгч ажиллахыг сануулжээ.
Сэтгэгдэл (0)
Сэтгэгдэл бичигдээгүй байна