Ж.Эрдэнэбат УИХ-ын гишүүний тангарагаа өргөж, УИХ дахь АН-ын бүлэг чуулганы танхимыг орхилоо

Өнөөдрийн /2021.03.18/ УИХ-ын хаврын чуулганы үдээс өмнөх хуралдааны төгсгөлд УИХ-ын сонгуулийн 13 дугаар тойрог буюу Сэлэнгэ аймгаас сонгогдсон Ж.Эрдэнэбат УИХ-ын гишүүний тангарагаа өргөлөө. 

Нийт есөн сарын хугацаанд хоригдож байгаад Дээд шүүхийн шийдвэрээр суллагдсан Ж.Эрдэнэбатад хандан МУ-ын Ерөнхийлөгч Х.Баттулга "УИХ-ын гишүүд малын хулгай шиг газар дээрээ баригддаггүй юм. Цагаан захтнуудын хэрэг гарын үсгээр явдаг" гэдгийг онцлоод суудал нь бүрэн шийдэгдээгүй Ж.Эрдэнэбат тангараг өргөх ёслолоосоо түр татгалзах хэрэгтэй хэмээн үзэж буйгаа илэрхийлсэн юм. 

Харин үүнийг УИХ-ын дарга Г.Занданшатар тангараг өргөх үйл явц хуулийн хүрээнд явагдаж байгаа гэдгийг тайлбарлаад, УИХ-ын гишүүд энэ асуудалд үг хэлэх эрхгүйг сануулсан юм.  

УИХ дахь АН-ын бүлгийн гишүүд ерөнхийлөгчийн саналыг дэмжиж буйгаа илэрхийлэн тангараг өргөх ёслолыг эсэргүүцэн чуулганы танхимыг орхисон ч УИХ-ын гишүүн Ж.Эрдэнэбат тангаргаа өргөлөө.