АНУ нь Израилд 735 сая долларын өндөр нарийвчлалтай зэвсэглэл нийлүүлэхээр болсон тухай “The Washington Post” сонин мэдээлсэн байна. Тус сонины эх сурвалжийн мэдээлснээр Жо Байдены захиргаа нь Израилтай зэвсгийн наймаа хийх гэж байгаагаа бүс нутаг дах байдал хурцдаж эхлэхээс өмнө, бүр тавдугаар сарын 5-нд мэдүүлээд байсан юм байна. Одоо энэхүү мэдүүлгийг нь Конгресс баталгаажуулснаар наймаа хийгдэх боломжтой болох юм. Энэ зуур Цагаан ордон нь Израилыг Гаазын бүсэд газрын ажиллагаа явуулахгүй байхаар ятгаж чадсан тухай “Politico” сонин мэдээлсэн байна.
Тус сонины мэдээлж буйгаар Америкийн Ерөнхийлөгчийн захиргааны хүмүүс Израилын Ерөнхий сайд Биньямин Нетаньяхутай албан бус байдлаар холбогдон Палестины радикал бүлэглэлүүдийн эсрэг хуурай замын байлдааны ажиллагаа явуулаад хэрэггүй гэж ятгаж чадсан аж. Иймд Израил нь хотууд руу нь тасралтгүй пуужин харваж байгаа Гаазын зурваст армийн хүчээр дайралт хийхээс татгалзсан гэжээ. Түүнчлэн АНУ нь Египетийн Засгийн газартай тохиролцоо хийж Гаазын сектор дах палестинчуудын бүлэглэлд дэмжлэг үзүүлэхгүй байхаар тохиролцсон гэж мэдэгджээ. Иймд бүс нутаг дах хурцадмал байдал ойрын үед намжина гэж хүлээж байгаа юм байна.
Сэтгэгдэл (0)
Сэтгэгдэл бичигдээгүй байна